Në mbledhjen e sotme të Këshillit të Legjislacionit, ku u diskutua për dorëheqjen e anëtarëve të Gjykatës Kushtetuese, dhe kalimi i tyre ne sitën e Vetingut kryetari i këtij komisioni, deputeti i PD, Alibeaj u shpreh se pavarësisht dorëheqjes së gjyqtarëve dhe prokurorëve, ata nuk duhet të amnistohen nga Vetingu.
“Do ti bëjmë letër organeve të Vetingut dhe ONM për të ndërhyrë në legjislacion nëse ka nevojë, për të parë nëse duhet apo jo të amnistohen gjykatësit dhe prokurorët pas dorëheqjeve. Mirë do të ishte të mos amnistoheshin, pasi nuk është e këshillueshme”, u shpreh Enkelejd Alibeaj.
Gjykata Kushtetuese ka mungesë në 3 anëtarë, pasi njërit prej tyre i ka mbaruar mandati, ndërsa dy të tjerët kanë dhënë dorëheqje për arsye personale.
Sokol Berberi, Besnik Imeraj dhe Vladimir Kristo janë tre anëtarët e Kushtetueses të cilët, nuk do ti nënshtrohen Vetingut për shkak se kanë dhënë dorëheqjen, duke përfituar kështu nga amnistia që parashikon ligji, por duke mos pasur të drejtën të hynë në sistem për 15 vite. Mbrëmjen e djeshme, Komisioni i Pavarur i Kualifikimit, vendosi që Besnik Imeraj të mos i nënshtrohet Vetingut.
