Të paktën 22 persona kanë humbur jetën nga dy shpërthime të dyshuara si sulme terroriste në afërsi të një salle koncertesh në Manchester.
Koncerti ishte duke u zhvilluar në ambientet e “Manchester Arena” dhe po performonte këngëtarja e njohur amerikane, Ariana Grande.
Policia është mobilizuar së bashku me ambulancat dhe ekipet e ndihmës së shpejtë, duke iu ardhur në ndihmë të lënduarve, por bilanci i kësaj ngjarje është tragjik.
Gjithashtu dy helikopterë monitoruan zonën ku ndodhi shpërthimi, ndërsa policia ka bërë thirrje që të shmanget zona afër “Manchester Arena”.
Dëshimtarë pranë vendit të ngjarjes kanë deklaruar se shpërthimi ka qenë i fuqishëm, ndërsa dyshohet se bombat kanë qenë të ndërtuara me gozhdë dhe përbërës të tjerë metalikë me synim që të shkaktonin sa më shumë viktima.
Policia e Mançesterit: Ishte sulm kamikaz
Shefi i policisë së Mançesterit, Ian Hopkins ka konfirmuar pistën e terrorizmit në shpërthimin që ndodhi mbrëmjen e së hënës në një sallë koncertesh.
“Personi që sulmoi “Manchester Arena” ka vdekur në vendin e ngjarjes menjëherë pasi ka aktivizuar eksplozivin”, ka deklaruar Hopkins, i cituar nga BBC.
Zyrtari i lartë ka shtuar se hetuesit po përpiqen të zbulojnë nëse personi ka vepruar i vetëm apo ka patur bashkëpunëtorë.
Ndërkohë, kryeministrja britanike Theresa May ka publikuar një mesazh ngushëllimi dhe solidariteti për familjet e viktimave.
“Ngjarja po hetohet si një sulm i tmerrshëm terrorist”, ka deklaruar May në një komunikatë të shpërndarë nga Downing Street.
Ndërkohë, fushata elektorale në mbarë Britaninë e Madhe është ndërprerë për shkak të sulmit; ndërsa është paralajmëruar një mbledhje e qeverisë dhe Komitetit të emergjencës Cobra, me kërkesë të kryeministres.
Ndërkohë, në vijim të raportimeve BBC bën me dije se numri i viktimave ka shkuar në 22 të vdekur dhe 59 të plagosur, mes të cilëve edhe fëmijë.
Dëshmitarja: Shpërthimi u dëgjua deri në 4 blloqe larg
Një banore e vendit ku ka ndodhur shpërthimi ka rrëfyer se shpërthimi ka qenë i fuqishëm dhe është dëgjuar në banesën e saj 4 blloqe larg vendit ku po mbahej koncerti.
Një tjetër vajzë e cila ishte prezente në koncert tregon se janë dëgjuar dy zhurma të mëdha dhe pastaj të gjithë ishin në gjendje të lartë paniku.
Reagon Ariana Grande: Jam zemërthyer
Pas shpërthimeve reagon edhe këngëtarja amerikane Ariana Grande, e cila po performonte në momentet e shpërthimeve në “Manchester Arena”
Në një status në Twitter Grande shkruan se i është thyer zemra dhe se nuk ka fjalë të shprehet.
Ora 03:00 Reagon Ariana Grande: Jam zemërthyer
Pas shpërthimeve reagon edhe këngëtarja amerikane Ariana Grande, e cila po performonte në momentet e shpërthimeve në “Manchester Arena”
Në një status në Twitter Grande shkruan se i është thyer zemra dhe se nuk ka fjalë të shprehet./a.ç/b.an
