Të paktën 13 persona kanë humbur jetën dhe 66 të tjerë kanë mbetur të plagosur pas një shpërthimi të fuqishëm në një impiant energjetik në zonën e Ras Laffan, një nga qendrat më të mëdha të prodhimit dhe eksportit të gazit natyror të lëngshëm (LNG) në botë.
Lajmi u konfirmua nga Ministri i Energjisë i Katarit, i cili bëri të ditur se, bazuar në të dhënat paraprake, ngjarja dyshohet të jetë shkaktuar nga një aksident dhe nuk ka indikacione që lidhen me sabotim apo ndonjë sulm të qëllimshëm.
Autoritetet kanë nisur hetimet për të zbardhur shkaqet e sakta të shpërthimit, ndërsa ekipet e emergjencës vijojnë operacionet në zonën e prekur.
Pavarësisht incidentit të rëndë, Ministri i Energjisë siguroi se aktiviteti i sektorit energjetik nuk pritet të ndikohet.
“Incidenti nuk do të ndikojë në asnjë mënyrë në eksportet apo kërkesat lokale”, deklaroi ai, duke theksuar se furnizimi me energji dhe eksportet e LNG-së do të vijojnë normalisht.
Ras Laffan konsiderohet zemra e industrisë së gazit në Katar dhe një nyje kyçe për tregjet globale të energjisë, çka e bën çdo incident në këtë kompleks me interes të lartë ndërkombëtar.
