Një shpërthim i fuqishëm në një xhami në Afganistan, të premten, la të vrarë të paktën 18 persona.
Ndër të vrarët është edhe një imam me ndikim i cili më herët këtë vit kishte bërë thirrje që secili person që bën “edhe veprimin më të vogël” kundër qeverisë, t’i hiqet koka.
Dhuna ka rënë kryesisht në Afganistan që kur talibanët u kthyen në pushtet vitin e kaluar, por disa shpërthime me bomba – disa që synonin komunitetet pakicë – kanë tronditur vendin në muajt e fundit, shumë prej të cilave pretendohen se janë kryer nga grupi xhihadist, Shteti Islamik (IS).
Të paktën 18 persona u vranë dhe 23 u plagosën në shpërthimin e së premtes, tha Hameedullah Motawakel, zëdhënës i guvernatorit të provincës Herat, në një mesazh për mediat.
Zëdhënësi i qeverisë, Zabihullah Mujahid konfirmoi se Mujib ur Rahman Ansari, imami i xhamisë, ishte në mesin e të vdekurve.
“Një dijetar i fortë dhe i guximshëm fetar i këtij vendi u martirizua në një sulm brutal”, tha ai në Twitter.
Ansari ishte një klerik me ndikim i njohur për fjalimet e tij të zjarrta.
Ansari është kleriku i dytë pro-taliban që vritet në një shpërthim në më pak se një muaj, pas një sulmi të mëparshëm vetëvrasës që kishte në shënjestër Rahimullah Haqqanin në medresenë e tij në Kabul.
Disa xhami anembanë vendit janë shënjestruar këtë vit, disa në sulme të marra përsipër nga IS.
Të paktën 21 persona u vranë dhe dhjetëra të tjerë u plagosën më 17 gusht kur një shpërthim shpërtheu në një xhami të mbushur me besimtarë në Kabul.
IS ka shënjestruar kryesisht komunitetet pakicë si shiitët, sufistët dhe sikët.
Ndërsa IS është një grup islamik sunit si talibanët, të dy janë rivalë të ashpër dhe ndryshojnë shumë në baza ideologjike.
Zyrtarët qeveritarë pretendojnë se IS është mposhtur, por ekspertët thonë se grupi është sfida kryesore e sigurisë për sundimtarët aktualë islamikë të vendit.
Që nga marrja e pushtetit pas tërheqjes së forcave të udhëhequra nga NATO në gusht të vitit të kaluar, talibanët nuk kanë arritur të sigurojnë njohje për qeverinë e tyre, ku shumë vende në Perëndim kërkojnë që grupi të respektojë të drejtat e grave dhe pakicave në vend. REL
g.kosovari
