Koreja e Veriut lëshoi sot një raketë balistike nga një nëndetëse, por ajo shpërtheu menjëherë pas lëshimit, njoftoi ushtria koreanojugore.
”Lëshimi i raketës balistike nga nëndetësja, u krye në qytetin lindor bregdetar Sinpo”, njoftoi agjencia zyrtare koreanojugore e lajmeve, Yonhap.
“Raketa u lëshua normalisht nga nëndetësja, por ne vlerësojmë se fluturimi i saj nuk ishte i suksesshëm. Ajo u lëshua nga një nëndetëse me peshë 2 000 tonë, përpara se të shpërthente në një lartësi prej 10 kilometrash”, shton Yonhap, që citon burime të paidentifikuara ushtarake.
Lëshimi i raketave balistike përbën shkelje nga ana e Koresë së Veriut të rezolutave të OKB-së për programin bërthamor të Phenianit. (java / r.a)
