Dje në Durrës, dega e PD ka zhvilluar mbledhjen e saj të kryesisë, ku i deleguar ka qenë deputeti Arben Imami, i cili është edhe kryetari i grupit të punës për këtë degë.
Mbledhja është zhvilluar pas incidentit të disa javë më parë kur Imamit iu mbyll dera e selisë të partisë. Dje gjakrat janë qetësuar, por Imami është gjendur përballë një sulmi frontal dhe një rebelimi të plotë nga shumica e kryesisë së PD në Durrës, të cilët kundërshtonin fort vendimin për ndarjen e kësaj dege në dy pjesë, një ti përkasë qytetit dhe tjetra fshatit.
Shumica e kryesisë, përjashto disa emra si Pëllumb Berisha Sabah Jemishta, Ferdinand Xhaferri dhe Dejana Burgjia, kjo e fundit, sekretare e degës, ish-pjesëtare e stafit të Edi Ramës në zgjedhjet e vitit 2007.
Mësohet se shumica e kryesisë kanë kundërshtuar ndarjen duke akuzuar se vendimi i nxjerrë nga Basha ishte anti –statutor. Kjo për shkak se në nenin 4 të statutit të PD-së thuhet qartazi se kjo forcë politike organizohet dhe funksionon në bazë të ndarjes administrative.
Anëtarët e kryesisë kanë akuzuar se një grup i rikthyer rishtazi në PD kërkon të vendosë influenca dhe të kap partinë në territore të ndryshme, të cilat i ka humbur prej kohësh.
Burime nga mbledhja e i thanë citynews se anëtarët e kryesisë kanë qenë të drejtpërdrejtë në akuzat e tyre ndaj sekretarit organizativ Enno Bozdo dhe sekretari i Burimeve Njerëzore, Fatbardh Kadilli, duke i quajtur ata përgjegjës për këtë vendim skandaloz dhe përçarës.
“Bozdo dhe Kadilli kërkojnë të përçajnë PD e Durrësit për interesa të një grupi që bën ecejake në parti. Një grup që e ka dëmtuar Partinë Demokratike dhe tani rikthehet sërish për ta dëmtuar brenda strukturave të saj”, është shprehur në mbledhje një nga anëtarët e partisë, i cili ka theksuar më tej se dega e PD Durrës nuk do të pranojë kurrë një urdhër anti-statutor.
Një tjetër anëtar mësohet të ketë theksuar se vendimi i nxjerrë jo vetëm është anti-statutor, por në rastin konkret nuk është pyetur kurrë asnjë prej drejtuesve të degës apo anëtarëve të saj dhe lajmin për ndarjen e saj, anëtarët e kryesisë e kanë mësuar nga mediat.
Kreu i PD në Durrës, Osman Stafa, konfirmoi mbledhjen për dhe tha se mbi 85% e kryesisë ka qenë hapur kundër ndarjes. Vetëm disa persona kanë qenë pro saj.
Ende nuk dihet si do të veprohet pas këtij rebelimi ku shumica e kryesisë të degës së Partisë Demokratike në Durrës kundërshton hapur vendimin e Bashës, përgatitur nga Bozdo dhe Kadilli.
