Më shumë se 14 fshatra të rajonit rus Ryazan, janë evakuuar urgjentisht, pasi një bazë ushtarake është përfshirë nga flakët. Zjarri i madh ka arritur shpejtë në depon e armëve duke shkaktuar shpërthime të shumta nga të cilat 2 persona janë plagosur dhe mijëra fshatarë janë larguar nga shtëpitë e tyre.
Ministria Ruse e Mbrojtjes ka deklaruar se municionet janë ndezur në bazën ushtarake që ndodhet jashtë fshatit rus Zheltukhino, dhe kanë bërë që predhat në bazë të shpërthejnë pothuajse çdo 10 sekonda, duke shkaktuar flakë dhe zhurma të mëdha.
Deri tani nuk është bërë e ditur për humbje jetësh por situata vazhdon të jetë e komplikuar nga zjarri që po përhapet me shpejtësi për shkak të erërave të forta.
Sipas disa raportimeve, flakët tashmë kanë arritur në fshatrat jashtë bazës dhe janë dërguar ushtarakë dhe një tren zjarrfikës për të lokalizuar atë. Gjithashtu, katër aeroplanë zjarrfikës Il-76 dhe disa helikopterë Mi-8 janë të përgatitur për të ndihmuar në mision.
/a.r
