Anëtari i Këshillit qendror të SNS, Dushan Kozarev, kryetar i së cilës është kryeministri aktual në Serbi, Aleksandar Vuçiç, ka thënë se kulmi i hipokrizisë është kur Vuk Jeremiç flet për politikë fatale ndaj Kosovës. Nuk munguan as akuzat për tradhëti.
Vuk Jeremiç është kandidat presidencial në Serbi, në zgjedhjet që do të mbahen në muajin prill.Kozarev theksoi se “populli ynë në Kosovë e Metohi ‘e njeh më mirë Jeremiç Vuk Brankoviqin’” (Vuk Brankoviç: Figurë mesjetare serbe që nga serbët konsiderohet si tradhëtar).
Kozarev ka thënë se “derisa Jeremiçi pasurohej dhe plaçkiti shtetin dhe qytetarët, bëri gjithçka që njerëzit nga Kosova të dëbohen nga shtëpitë e tyre, të mbeten pa të drejta dhe të uritur”, rapoton B92.
“Populli ynë në Kosovë dhe Metohi e njeh më së miri Jeremiq Vuk Brankoviqin, e di krejt atë që ai bëri që të dëmtojë çdo shtëpi serbe, më së miri i njeh ‘aftësitë’ e tij dhe për këtë arsye nuk do t’a falë atë edhe për heqjen e Korpusit të Prishtinës, kur ai ishte këshilltar i ministrit të Mbrojtjes, e as kalimin e dialogut nga OKB-ja në Bruksel”, ka thënë Kozarev.
Më tutje zyrtari i partisë së Vuçiqit i vërsulet Jeremiqit për debaklin në GJND.Kozarev ka theksuar se “Jeremiqit nuk do t’i falet amatorizmi para Gjykatës Ndërkombëtare të Drejtësisë në lidhje me shpalljen e njëanshme të pavarësinë së Kosovës, e as marrëveshjet katastrofike të pakthyeshme të cilat ai dhe bashkëpunëtorët e tij në Ministrinë e Punëve të Jashtme i kanë arritur me me Kosovën, si vendosja e kalimeve administrative, dokumentet personale, target e regjistrimit, si dhe shumë veprime të tjera që popullin tonë në Kosovë e Metohi e sollën në prag të mbijetesës”.
Mediat serbe më heret raportuan për akuza të rënda që Jeremiçi i kishte bërë partisë së Vuçiq-it, përfshi një kabllogram të Wikileaks të vitit 2008, sipas të cilit Ministri aktual i Punëve të Brendshme dhe zyrtar i lartë i partisë SNS, Nebojsha Stefanoviç, i kishte premtuar CIA-s amerikane se kjo parti do të zgjidhë çështjen e Kosovës, raporton Gazeta Express. (b.an)
