Në kuadër të operacionit policor antidrogë të koduar “Ndalesa” janë arrestuar 3 persona dhe është shpallur në kërkim një tjetër që shpërndanin doza me lëndë narkotike në qytetin e Vlorës.
Konkretisht, janë arrestuar:
E. Q., 22 vjeç, banues në lagjen “Pavarësia”;
B. K., 48 vjeç, banues në lagjen “Pavarësia”;
R. H., 43 vjeç, banues në lagjen “Isa Boletini”.
Gjithashtu, u shpall në kërkim shtetasi:
D. M., 28 vjeç, banues në lagjen “Pavarësia 2”.
Ata dyshohen se vepronin si grup, duke siguruar lëndën narkotike, të cilën më pas e ndanin në doza dhe e shpërndanin për shitje në qytetin e Vlorës.
Gjatë kontrollit të ushtruar në banesat dhe ndaj tyre, shërbimet e Policisë gjetën dhe sekuestruan disa doza me lëndë narkotike kanabis, një peshore elektronike të dyshuar për peshimin e lëndëve narkotike dhe 3 aparate celulare të përdorura për aktivitetin kriminal.
Vijon puna për kapjen e shtetasit të shpallur në kërkim, si dhe për identifikimin dhe vënien përpara përgjegjësisë ligjore të shtetasve të tjerë që mund të jenë të përfshirë në këtë veprimtari kriminale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
