Prej rreth 1 muaji tashmë Shqipëria ndodhet nën izolim, si masë paraprake për të frenuar përhapjen e mëtejshme të koronavirusit.
Masat e shumta por të nevojshme që janë marrë kohët e fundit, ia kanë vështirësuar edhe më shumë jetën njerëzve.
Në këto kohë të vështira fondacioni “Fundjavë Ndryshe” vijon me misionin e saj, për t’iu ardhur në ndihmë atyre që janë më në nevojë.
Drejtuesi fondacionit “FFN”, Arbër Hajdari ka bërë me dije se ditën e sotme janë shpërndarë 45 ton ndihma në qarkun e Korçës.
Ai ka shpërndarë në Facebook një video nga operacioni i gjerë, teksa ka falënderuar edhe bamirësit që kanë kontribuuar në mbledhjen e ndihmave.
Ditën e sotme janë ndarë pako ushqimore në familjet në zonën e Korçës, Pogradecit, Maliqit, Pustecit, Kolonjës dhe Devollit.
“Sot 45 ton ndihma në Qarkun e Korçës. Ndihmat për Korçën, Pogradecin, Maliqin, Pustecin, Kolonjën, Devollin. Do ta kalojmë bashkë! Faleminderit bamirësve!”, shkruan në postimin e tij, Arbër Hajdari, themeluesi i fondacionit “Fundjavë Ndryshe”.
Që nga shpërthimi i kësaj epidemie në vend, “Fundjavë Ndryshe” ka vizituar shumë zona të prekura, ku kanë shpërndarë mijëra pako ushqimore si dhe produkte higjienike.
Operacionet me ndihma nga ky fondacion do të vijojnë edhe në ditët në vijim, në familje të tjera të cilat kanë nevojë për ndihmë.
