Çmimet e naftës ranë ndjeshëm, obligacionet u rritën dhe aksionet ishin në nivele të larta pas njoftimit për një armëpushim dy-javor me Iranin, duke sjellë një valë lehtësimi në tregje. Investitorët shpresojnë në rifillimin e qarkullimit të naftës dhe gazit përmes Ngushticës së Hormuzit.
Presidenti amerikan, Donald Trump, tha të martën vonë se kishte rënë dakord të ndërpritej çdo sulm ndaj Iranit për dy javë, duke shtuar se një marrëveshje afatgjate paqeje është në proces. Irani tha se do të ndalojë sulmet nëse nuk ka sulme, dhe se tranziti i sigurt përmes Ngushticës së Hormuzit do të jetë i mundur për dy javë në koordinim me Forcat e Armatosura Iraniane.
Tregjet globale u tronditën që nga sulmet e SHBA-së dhe Izraelit ndaj Iranit në fund të shkurtit, të cilat bënë që Teherani të mbyllte praktikisht Ngushticën e Hormuzit, një rrugë kyçe për tranzitin e një të pestës të naftës dhe gazit botëror. Çmimet e naftës bruto amerikane ranë rreth 16.5% në 94 dollarë për fuçi, ndërsa indeksit S&P 500 iu rritën kontratat e ardhshme mbi 2%, dhe dollari amerikan ra gjerësisht, pas një periudhe gjatë së cilës kishte shërbyer si aset strehimi gjatë trazirave.
“Tregjet kanë parashikuar se Trump po kërkonte një rrugëdalje nga Irani”, tha Jamie Cox, partner menaxhues në Harris Financial Group. “Sot e gjeti atë”.
Kontratat e ardhshme tregojnë fitime të gjera për tregjet aziatike, të cilat janë goditur nga lufta dhe rritja e çmimeve të energjisë, ndërsa kontratat e ardhshme të thesarit amerikan për 10-vjeçarët u rritën rreth 15 pikë.
Trump njoftoi gjithashtu se SHBA-të kishte marrë një propozim 10-pikësh nga Irani, të cilin e quajti bazë të punueshme për negociata, dhe shtoi se palët janë shumë afër arritjes së një marrëveshjeje për paqe afatgjatë.
Analisti i IG, Tony Sycamore, komentoi: “Është një fillim i mirë dhe mund të hapë rrugën për një rifillim më të përhershëm – por ka ende shumë ‘nëse’ që duhet zgjidhur.”
