Nëse mendoni se Shqipëria është e trazuar në mbajtjen e zgjedhjeve atëherë duhet të dini se ka edhe më keq. Në Meksikë në zgjedhjet lokale që do të mbahen dy në Qershor dy kandidatë janë ekzekutuar gjatë 24 orëve të fundit.
Bëhet fjalë për Enrique Hernandez Salcedo dhe Hector Lopez Cruz. I pari, i cili ishte kandidat për kryetar bashkie në Yurecuarom, u qëllua për vdekje gjatë fushatës në një shesh publik nga persona të armatosur.
Ndërsa vetëm pak orë më vonë në Huimanguillo, Hector Lopez Cruz u qëllua me breshëri plumbash në rrugicën pranë shtëpisë së tij ku mbeti i plagosur edhe i vëllai i tij.
Ndërkohë që pak ditë më parë Silvia Romero, ish-ministre e arsimit, aktualisht kandidate në zgjedhjet lokale, u rrëmbye nga persona të panjohur. Por situata në Meksikë nuk është e rastësishme pasi Aide Nava kandidate nën siglën e partisë PRD, u ekzekutua nga anëtarë të një bande kriminale, të cilët më parë i kishin vrarë bashkëshortin dhe i rrëmbyen djalin.
Vrasësit e lanë trupin e pajetë të Aide Nava-s në një rrugë, ku kishin lënë edhe një mesazh. “Kjo është ajo që do të ndodhë me të gjithë politikanët e ndyrë”.
