E sjellë nga policia si një grindje banale, historia e plagosjes dhe përleshjes me armë midis të rinjve në zonën e ish-Parkut të Autobusëve në Tiranë dy netë më parë, me shumë mundësi ka ndodhur për pazare droge.
Këtë nuk e vërteton vetëm e kaluara e të rinjve, por edhe një monitorim i platformës Fol, e cila tregon se njëri nga të plagosurit, shtetasi Xhulio Vela, që rezulton se është në gjendje të rëndë, raportohet në këtë platformë online si i arrestuar në datën 19 mars 2021.
“Akuza ndaj Xhulio Velës, është ajo e prodhimit dhe shitjes së narkotikëve, 26-vjeçari u kap me drogë në makinë me lëndë narkotike të llojit kokainë dhe një armë të ftohtë thikë”, – evidentohet në platformë.
Por teksa prokuroria kërkon masë sigurie ‘arrest me burg’, gjykata rezulton sipas platformës, se vendos masën detyrim paraqitje në datën 20 mars, duke i dhënë atij lirinë dhe daljen nga paraburgimi.
I riu mbeti i plagosur në rrugën “Frosina Plaku” së bashku me Aleksandër Nikolla, një tjetër i ri nga Kurbini, ndërkohë që autori, i cili qëlloi dhe u arrestua, është një tjetër i ri I moshës 26-vjeçare, njëherazi i proceduar për drogë.
Edhe ai, sipaa monitorimit të qendrës Fol, arrestohet për narkotikë në datën 17 qershor 2021 së bashku me Deivid Shuaipi, Jurgen Halitaj, Denard Buci, Fabjan Pitani, Doris Murati dhe disa të rinj të tjerë që u identifikuan si anëtarë të një grupi që shpërndan drogë në Tiranë dhe që për të fshehu gjurmët e përfshirjes së narkotikëve, ata dyshohet se i vunë flakën një automjeti të policisë, që I përkiste një oficeri, i cili jetonte në zonën ku ata ushtrojnë aktivitetin kriminal.
Ky shtetas nga monitorimi i Qendrës Fol rezulton se ai përfundoi nën masën arrest me burg. Dosja tregon se të rinjtë shkëmbyen armë zjarri për motive banale, por realisht monitorimi tregon se secili prej të dyshuarve ka probleme me drogën.
Policia gjeti pesë gëzhoja, një fishek, Red Bull, kafe dhe tavull duhani, ndërsa përveç Palushit, u identifikuan në ngjarje edhe shtetasit Daniel Manushi dhe Islam Xhetani.
Policia thotë se pas përleshjes me armë zjarri, shkoi në banesën ku u strehuan autorët, ku dhe gjeti Farjon Palushin, një i kërkuar për rrjetin e shpërndarësve të drogës, ndonëse autoritetet thonë për të se ai, sakaq ishte nën ‘arrest shtëpiak’.
Policia gjeti në banesën e tyre armë të markës “Stey” me numër serial të fshirë. Ndërsa të pyetur nga policia, ata ngrenë supet dhe lënë të kuptohet se ishte çdo gjë një grindje banale. Daniel Manushi, thotë se kishte shkuar për t’u qethur dhe aty kanë bërë debat me disa djem që nuk i njihte.
“Kanë gjuajtur shokun tim, Farjon Palushi me grushte dhe më pas, njëri prej tyre nxori armën dhe e ka goditur në këmbën e majtë. Është rrëzuar dhe pastaj ka ikur me vrap. Këta shtetas nuk i njoh dhe nuk i kam parë si fytyra”, – rrëfen më tej i riu, që dyshohet për përkrahje të autorit të krimit.
Sipas tij, ai, kur mbërriti policia ishte në banesë me Palushin dhe se pikërisht shoku i tij ia kishte treguar vetë policisë se ku e kishte fshehur armën. ”Në lidhje me këtë armë, Farjoni ia tregoi vetë policisë, ai ia mori nga dora personit që ka qëlluar mbi atë”.
Edhe i proceduari Palushi insiston se kishte shkuar për t’u qethur te berberi. “Njëri nga djemtë më është afruar dhe është ulur në tavolinë, ka mbushur armën dhe gjuajti shokun në pjesën e këmbës. E kapa nga duart për t’u vetëmbrojtur dhe në këtë kohë jam përfshirë në konflikt fizik. Aty erdhën dhe disa persona që më gjuajtën në kokë dhe në pjesën e qafës. Në kohën që ishim në tokë, dikush nga personat që ka gjuajtur, është rrëzuar dhe nga pistoleta është bërë prapë qitje dhe një person ka rënë në tokë”.
I plagosuri Aleksandër Nikolla, ka thënë që nuk ka dijeni dhe nuk ka mundësi të tregojë mbi rrethanat e ngjarjes, thonë burime të Gazetasi, të cilat shtuan se pavarësisht deklaratës së të rinjve, ata dyshohen për vrasje me dashje të mbetur në tentativë dhe për këtë do të hetohen në vijim. Por motivet nuk janë ende të qarta dhe ndaj është lënë versioni që ata kanë rrëfyer./GazetaSi
g.kosovari
