Një ngjarje e rëndë ka tronditur qytetin e Shkodrës. Një shpërthim me tritol në një dyqan ka shkaktuar 7 të plagosur, ngjarje e ndodhur gjatë paradites së sotme.
Raportohet se 2 prej personave të plagosur janë transportuar drejt Tiranës pasi janë në gjendje të rëndë ndërsa 5 të tjerët po marrin ndihmë në spitalin e Shkodrës.
Emrat e të plagosurve nga atentati janë Lulzim Kullaj – 42 vjeç, Arjola Gjonaj – 31 vjeçe, Pjetër Arra 53 – vjeç, Gentian Suça – 40 vjeç, Ditmir Myftia – 32 vjeç, Pjeter Daka – 60 vjeç dhe Gardosileviç Roikq – 50 vjeçe.
Raportohet se objektiv ishte shtetasi Lulzim Kulla, i njohur si ‘i forti’ i Shkodrës. Ai mbeti i plagosur në ngjarje. Shpërthimi ndodhi sapo Kulla iu afrua dyqanit në pronësi të tij. Lulzim Kulla është emër i njohur për policinë pasi njihet si “i forti” i Shkodrës i cili nënshtroi tregtarët e këtij qyteti, duke iu marrë edhe bizneset. Ai dyshohet se ka marrë pjesë edhe në torturimin për vdekje të një personi në Shkodër, por për ngjarjen nuk është dënuar askush.
Personat e tjerë të plagosur raportohet se janë ndodhur aty rastësisht.
Ngjarja e rëndë ka ndodhur në lagjen “Rus”, shumë pranë qendrës së qytetit dhe në një zonë mjaft të frekentuar nga qytetarët. Eksplozivi ishte vendosur në hyrje të një dyqani. Nga shpërthimi ka pasur dëme të shumta materiale në godinë si dhe në një mjet që ndodhej aty pranë.
Raportohet se në katin e dytë të godinës ndodhet zyra e Shoqatës së pakicës serbe.
/a.m.