Dënimi me 15 vjet burg i 61-vjeçarit nga Kosova i cili qëlloi para dy vjetësh kushëririn e tij në rrugën Webergasse në St.Gallen nuk e ka kënaqur familjen e viktimës, Haki Spahiu. Familja Spahiu nga Gjilani janë shprehur të zhgënjyer me drejtësinë zvicerane lidhur me këtë rast. Anëtarët e familjes kanë thënë se janë të befasuar me dënimin e ulët që i është dhënë autorit.
“Kjo të le te kuptosh se si ka ecur ky proces gjyqësor, ku asnjë deklaratë dhe akuzë e familjes tonë nuk është përfshirë në aktakuzë, këtë vrasje me gjakftohtësi ky kriminel e ka bërë për motive të ulëta të parave që nuk i ka kthyer kurrë. Paratë që ka marrë për vite me radhë në besë për t`i ruajtur e që nuk janë pak, por me qindra mijëra franga”, kanë thënë për albinfo.ch familjarët e të ndjerit. Ata paralajmërojnë se do të ankohen në të gjitha nivelet gjyqësore brenda por edhe jashtë Zvicrës në rast se është e nevojshme.
“Ne si familje SPAHIU jo që nuk jemi të kënaqur me vendimin e gjykatës së qytetit të St. Gallen, por jemi shumë të befasuar dhe të zhgënjyer me rastin tonë, se si është e mundur që një figurë politike e partisë socia demokrate dhe president i sindikatave zvicerane gjithashtu edhe këshilltarë i lartë i parlamentit federal të Zvicrës si Paul Rechsteiner të jetë avokat mbrojtës dhe del në gjykatë të arsyetojë një kriminel, e mos të jetë mbrojtës i një punëtori që u ekzekutua në pritë pas shpine midis qytetit duke shkuar në punë në ora 5 të mëngjesit, ku për 16 vite me radhë, vëllai jonë i shërbeu me punë fizike dhe përkushtim e sjellje qytetit të tij dhe qytetarëve të St. Gallenit pa asnjë delikt”, thuhet ndër të tjera në reagimin e familjes që kanë dhënë për albinfo.ch.
Ngjarja
Haki S. pak përpara orës 5.00 ishte nisur të shkonte në punë. 42 vjeçari vinte shpesh ilegalisht në Zvicër për të punuar. Të njohurit e paraqitnin atë si miqësor dhe të respektueshëm. Kur ai doli nga shtëpia, kushëriri e priti me një armë. Nga një distancë prej 10 ose 20 centimetra 61 vjeçari qëlloi në kokë Hakiun. Pasi tërhiqet pak, ai qëllon edhe njëherë me një plumb tjetër të afërmin e vetë. Kësaj herë Hakiu bie në tokë dhe vdes.
Rrëzimi misterioz nga ballkoni
Sulmuesi i dyshuar më vonë pretendoi se Haki S. kishte pasur marrëdhënie intime me gruan e tij, andaj mori vendimin e rëndë. Por gruaja e tij nuk mund të pyetej për këtë, pasi ajo ishte rrëzuar fatalisht nga ballkoni në Kosovë, ku edhe ndërroi jetë.
Të afërmit dhe miqtë e Haki S. e përshkruajnë këtë pretendim të shpifur. “Bashkëshortja me Hakiun ishte kushërinj dhe shumë më e vjetër se sa ai,” tha një mik i viktimës. “Kurrë nuk kishin marrëdhënie ata të dy.” Ata pretendojnë se gjithçka ka ndodhur për para.
“Hakiu i kishte besuar kushëririt të tij prej disa vitesh rreth 100 mijë franga,” thotë i afërmi i viktimës. “Pasi ai ishte ilegalisht në Zvicër, nuk mund të hapte konto bankare.”
Në këto kushte i dyshuari për vrasje kishte keqpërdorur paratë e tij, përkundër faktit se gruaja i kishte kërkuar që Hakiut t’i kthehen paratë.
ma.me
