Edukimi i një fëmije ka një kosto të konsiderueshme për familjet shqiptare.
Shpenzimet nisin që në klasën e parë me blerjen e librave, të cilët, edhe pse ofrohen falas nga Ministria e Arsimit, shumë prindër preferojnë t’i blejnë në librari, pasi tekstet e ofruara nga shteti janë të plotësuara.
Më pas, shpenzimeve u shtohen mjetet shkollore, veshjet dhe nevoja të tjera që lidhen me shkollimin. Të gjitha këto së bashku bëjnë që kostot për shkollimin të kapin vlerën e 20 mijë lekëve të reja në muaj.
Romina Radonshiqi, eksperte ekonomie thotë për TCH:
“Edhe pse arsimi është falas, në fakt, nëse bëjmë një llogaritje të thjeshtë, mesatarisht për të gjithë Shqipërinë, të dërgosh sot fëmijën në shkollë të kushton rreth 20 mijë lekë të reja në muaj.
Sa më pranë kryeqytetit, aq më të larta janë shpenzimet për edukimin e fëmijës. Në Tiranë, ato mund të arrijnë në rreth 30 mijë lekë në muaj, kryesisht për shkak të kurseve private ato që njihen si afterschool, dhe transportit. Shumë prindër zgjedhin të paguajnë një furgon për lëvizjen e fëmijëve të tyre nga shtëpia në shkollë e më pas në kurs. Shpesh, prindërit detyrohen të paguajnë për orë mësimore shtesë në qendrat private të mësimdhënies, jo vetëm për të përmirësuar rezultatet e fëmijëve, por edhe për shkak të orareve të zgjatura të punës. Për familjet e reja afterschool-i shihet edhe si një vend i sigurt për ku mund të qëndrojë fëmija pas përfundimit të mësimit. Pa folur këtu për aktivitetin e afterschool-it, fëmijët kanë nevojë për mësime shtesë, ndërsa prindërve u duhet të punojnë me orare të zgjatura për të siguruar këto kosto të larta”.
Sipas ekspertes së ekonomisë, kur krahasohen kostot e jetesës me nivelin e pagave, një pjesë e madhe e të ardhurave familjare shkon për rritjen, edukimin dhe ushqyerjen e një fëmije. Janë faturat e kripura të edukimit dhe argëtimit ato që po sjellin familje të vogla.
Ekspertja sqaron ndër të tjera: Nëse krahasojmë koston e jetesës me nivelin e pagave, atëherë një pjesë e konsiderueshme e pagës shkon për rritjen e një fëmije, që do të thotë rritje, edukim dhe ushqyerje.
Kjo është edhe arsyeja përse çiftet e reja po e mendojnë dy herë vendimin për të bërë një fëmijë.
Për herë të parë qeveria shqiptare do të aplikojë programin “Pas Shkolle” në 408 shkolla, në të cilën do të zhvillohen aktivitete të ndryshme nga “Bëjmë detyra e shtëpisë e deri tek orët zbavitëse të muzikës, zejtarisë e sporteve”.
Sipas Ministrisë së Arsimi ky program nuk ka për qellim ruajtjen e fëmijëve deri sa prindërit të dalin nga puna, por edhe zhvillimin social dhe kulturorë.
