Pak kohë më parë disa studiues anglezë e çmontuan njërën minare, por as e zbuluan dot misterin, as e kthyen dot më në vend.
Xhamia Sidi Bashir në Ahmedabad të Indisë ka dy minare që, edhe pse janë 3 kate të larta secila, mund të lëkunden me një shtytje të dorës së njeriut. Por misteri nuk është vetëm ky, transmeton tch.
Pak sekonda pasi është tundur njëra minare, nis të tundet tjetra edhe pa e prekur njeri. Ajo që çudit shkencëtarët është se dy minaret nuk janë të lidhura me njëra-tjetrën, që të përcillen dridhjet.
Veç kësaj, janë të ndërtuara vetëm me gur. Nuk kanë as çelik, as ndonjë material fleksibël.
Ekzistojnë dy xhami të tilla, dhe besohet se tundjet e minareve realizohen nëpërmjet vendosjes së ekulibruar të gurëve me të cilët janë ndërtuar, por se si përçohen dridhjet nga njëra minare tek tjetra, ende nuk e shpjegon dot njeri.
Xhamitë janë ndërtuar rreth 500 vite më parë, dhe njërës i është hequr një minare nga kolonizatorët anglezë, por nuk mundën ta rikthejnë më në vend. (b.an)
