Shkencëtarët kanë përshkruar tre faza të veçanta të përparimit të sëmundjes COVID-19 te pacientët.
Ata i bëjnë thirrje profesionistëve mjekësorë që të konsiderojnë një qasje të individualizuar të trajtimit për pacientët bazuar në simptomat e tyre që korrespondojnë me këto faza të infeksionit, shkruajnë mediat e huaja.
Sipas shkencëtarëve tre faza të dallueshme të infeksionit COVID-19, me shkallë të ndryshueshme simptomash janë vërejtur te njerëzit që testohen pozitivë për sëmundjen vdekjeprurëse. Hulumtimi vuri në dukje se secila prej këtyre fazave karakterizohet nga një lloj i ndryshëm i ndërveprimit biologjik me virusin.
SARS-CoV-2, koronavirusi i ri që shkakton COVID-19, transmetohet përmes pikave të l ëshuara nga hunda ose goja e një personi të infektuar kur kolliten, teshtijnë ose, në disa raste, flasin.
Gjatë fazës së hershme të infeksionit (Faza 1), ata thanë se virusi shumëfishohet brenda trupit dhe ka të ngjarë të shkaktojë simptoma të buta që mund të ngatërrohen me një ftohje të zakonshme ose grip.
Faza e dytë është faza pulmonare (Faza 2), kur sistemi imunitar preket fuqimisht nga infeksioni, dhe çon kryesisht në simptoma të frymëmarrjes, siç janë kolla e vazhdueshme, gulçimi dhe niveli i ulët i oksigjenit. Problemet me koagulimin e gjakut, veçanërisht me formimin e mpiksjes së gjakut, mund të jenë mbizotëruese në fazën 2, vunë në dukje shkencëtarët në studim.
Faza e tretë, hiperinflamatore, ndodh kur një sistem imunitar i hiperaktivizuar mund të shkaktojë dëmtim të zemrës, veshkave dhe organeve të tjera. Në këtë fazë, studimi vuri në dukje se mund të ndodhë një “stuhi e citokinës”, ku trupi sulmon indet e veta.
g.kosovari
