Shkëlzen Berisha ka folur para mediave duke justifikuar refuzimin e dëshmisë së tij. Sipas tij, qëllimi i hetimeve për CEZ është justifikimi i vjedhjes së qindra milionë eurove nga Rama.
“Erdha në komision në respekt të ligjit. Personi që drejton kete Komision është i dënuar me vendim të formës së prerë për shpifje ndaj meje. Nga të gjithë këta deputetë që ka parlamenti, pse duhej zgjedhur pikërisht Balla për të drejtuar këtë komision. Zotëria nuk pranoi t’i lironte karrigen një kolegu” – tha djali i ish-kryeministrit.
Shkëlzen Berisha tha se nuk ka asnjë lidhje me Kalajn dhe Ismailin dhe aq me tëper me aktivitetin e tyre.
“Mirë Nue Kalaj nuk e gjejnë dot, por Ismaili pse nuk thirret të dëshmoj” – tha Shkëlzen Berisha.
***
Marrja në pyetje e Shkëlzen Berishës në Komisionin e CEZ ka nisur me debate. Partia Demokratike ka kërkuar para hyrjes së Berishës në Komision që kryetari Taulant Balla të japë dorëheqjen. Sipas PD, Balla ka konflikt interesi me Shkëlzen Berishën.
Balla e ka nisur marrjen në pyetje të Berishës duke i kujtuar atij ligjin për të thënë të vërtetën. Ndërkohë, Shkëlzen Berisha ka refuzuar të japi gjeneralitetet duke u shprehur se ato ndodhen në vendimin e gjykatës që e ka shpallur Ballën fajtor për shpifje.
Me të njejtin argument, djali i ish-kryeministrit ka refuzuar të bëjë edhe betimin para Komisionit Hetimor.
Ndërkohë, anëtar i Komisionit, Arben Ristani, tha se nuk është në interes nëse është e vlefshme dëshmia apo jo për shkak të mungesës ë betimit, por mjafton të dëgjohet dëshmitari.
“Ne nuk kemi kusur që të merremi me problemet personale tuajat.” – tha Ristani pas refuzimit të betimit nga Shkëlzen Berisha.
“Së pari dëshmia është e vlefshme për të hedhur dritë mbi një pistë hetimi, por ajo merret kur ka vlerë ligjore duke respektuar Kodin e Procedurës Penale. Nëse dëshmitari nuk bën betimin, ligji thotë se dëshmia quhet e pavlefshme. Për të mundësuar marrjen e dëshmisë i kërkoj medias të largohet dhe dy deputetët që e kanë kërkuar në komision të vijojnë me pyetjet” – tha Balla.
Balla e ka ndërprerë marrjen në pyetje të Berishës duke u shprehur se ai do të thirret sërish derisa të bindet për t’u betuar.
***
Komisioni hetimor për privatizimin e OSSH-së ka nisur dhe në kjrye të herës kryetari i komisionit, Taulant Balla ka deklaruar se efektivët e policisë së shtetit kanë shkuar në banesën e Nue Kalajt, por nuk e kanë gjetur aty.
Këtë të mërkurë pritej që Nue Kalaj, sekseri kryesor në aferën e CEZ dhe privatizimin e OSSH-së tek çekët, do duhej të dëshmonte në komisionin hetimor. Sipas Ballës, në shtëpinë e Kalaj ka qenë vetëm bashkëshortja e tij.
Soti pritet gjithashtu që në komision të raportojë edhe djali i ish- kryeministrit Shkëlzen Berisha. Sipas informacioneve pranë kuvendit, Shkëlzen Berisha ndodhet në ambientet e kryesisë dhe do të japë dëshminë e tij pas pak./java/a.k
