Tabelat e përmendoreve të disa figurave historike në Shkup u vandalizuan të premten për shkak se saktësonin që i përkisnin trashëgimisë greke. Mes veprave skulpturore të dëmtuara në qendrën e Shkupit janë monumenti i Aleksandrit të Madh, i Olimpias dhe i Filipit të Dytë. Qyteti është zotuar se do i zëvendësojë dhe do i mbrojë më mirë.
Emërtimet e disa monumenteve të figurave historike në Maqedoninë e Veriut kanë rënë pre e vandalizmit më pak se 24 orë pasi u ndryshuan me vendim qeverie.
Ndryshimi erdhi në kuadër të zbatimit të Marrëveshjes së Prespës të firmosur me Greqinë qershorin e kaluar.
Përpos se i dha fund konfliktit tridhjetëravjeçar mes dy fqinjëve, pakti parashikon që dy shtetet të mos përvetësojnë publikisht simbolet, kulturën apo figurat historike të njëri-tjetrit.
Tabelat e reja të përmendoreve të Aleksandrit të Madh, Olimpias dhe Filipt të Dytë u gjetën në mesnatë të dëmtuara ose të shkulura nga autoritetet e Shkupit.
Aktet vandale mendohet se u nxitën nga mbishkrimet e tabelave që cilësonin se personazhet e ekspozuara në Shkup nuk ishin maqedonas, por grekë të vjetër.
Përkatësisht në rastin e heroit Aleksandri i Madh, shkruhej se ai “i përket historisë dhe qytetërimit antik helen dhe trashëgimisë kulturore botërore.”
Qyteti i Shkupit ka njoftuar se do të marrë masat e nevojshme për të përforcuar mbrojtjen e veprave të veta skulpturore.
Ish-ministri i Jashtëm Nikos Kocias, që firmosi marrëveshjen historike për Greqinë, e përshëndeti të premten nismën duke e konsideruar një hap kundër irredentizmit.
Ndërkohë autoritetet lokale maqedonase po vijojnë punën për heqjen edhe të simbolit të Diellit 16-cepor të Verginës nga institucionet publike apo kapakët e pusetave nëpër qytete, simbol antik që po ashtu pretendohet nga Greqia.
