Tregtarët ambulantë që ushtrojnë aktivitetin e tyre përgjatë vijës bregdetare, nga ura e Dajlanit në afërsi të sektorit “Iliria”, janë kthyer në një shqetësim shumë të madh për pushuesit që kanë zgjedhur të frekuentojnë Durrësin për të kaluar pushimet verore.
Të shumtë në numër, ata bllokojnë me karrocat të mbushura me produktet e tyre (ushqimore dhe veshmbathje) thuajse të gjithë bregun, duke bërë që pushuesit të mos e shohin detin teksa qëndrojnë në shezlong, pasi u është “mbyllur” fushëpamja. Mjafton një vështrim përgjatë vijës bregdetare dhe konstaton fare lehtë që ajo është totalisht e mbushur me tregtarë ambulantë, të cilët tregtojnë produktet e tyre nëpër karroca dhe jo në pak raste me kafshë.
Pushuesit shprehen se ndihen të bezdisur nga tregtarët ambulantë, pasi përveçse zaptojnë hapësira në bregdet para shezlongëve, ngrenë zërin për të reklamuar produktet, duke shqetësuar të gjithë pushuesit. “Kemi ardhur me familjen nga Kosova, për të pushuar disa ditë në bregdetin e Durrësit. Vijmë këtu çdo verë, pasi ndihemi si në shtëpinë tonë.
Në përgjithësi jemi të kënaqur, pasi edhe çmimet s’janë shumë të larta. Por këtë radhë kemi konstatuar disa probleme në infrastrukturën e përgjithshme, pasi nuk ka banja, dushe publike apo kulla vrojtimi. Por një problem shumë shqetësues për pushuesit janë tregtarët ambulantë.
E kuptoj se duan të nxjerrin bukën e gojës, por për ne janë të bezdisshëm. Përveçse zaptojnë bregun e detit, ata reklamojnë produktet e tyre me zë të lartë, duke shqetësuar të gjithë pushuesit që kanë ardhur për t’u qetësuar në plazh”, pohon F. Tahiri, pushues nga Kosova. Të njëjtin shqetësim ngrenë edhe pushuesit e tjerë, që kërkojnë më tepër disiplinë dhe qetësi përgjatë vijës bregdetare.
“Shikoni si janë rreshtuar në vijën e parë tregtarët me karrocat e mbushura me kamerdare dhe rroba plazhi. E kanë bllokuar të gjithë horizontin. Janë kthyer në një shqetësim të madh për pushuesit, ndërsa institucionet nuk marrin asnjë masë për largimin e tyre. Me këto kushte që ofrohen këtu në Durrës, nuk mund të flasim për plazh elitar”, shprehet një tjetër pushues. Me qindra tregtarë ambulantë ushtrojnë aktivitetin e tyre jashtë çdo standardi në vijën bregdetare të Durrësit.
Por kur të gjithë presin ndërhyrjen e autoriteteve për largimin e tyre nga vija bregdetare, numri i tregtarëve të paligjshëm po shtohet dita-ditës me ritme të shpejta. Kohët e fundit flitet për aksione të shpeshta përgjatë vijës bregdetare nga ana e institucioneve përgjegjëse për mbarëvajtjen e sezonit veror, por rezultatet lënë për të dëshiruar, pasi produktet ushqimore tregtohen jashtë çdo standardi higjieno-sanitar./panorama/a.k
