Një delegacion i lartë iranian ka mbërritur në Islamabad përpara bisedimeve të planifikuara me SHBA-në, të cilat pritet të zhvillohen këtë fundjavë nën masa të rrepta sigurie.
Sipas raportimeve, delegacioni iranian drejtohet nga ministri i Jashtëm Abbas Araghchi dhe kryetari i Parlamentit Mohammad Bagher Ghalibaf. Ndërkohë, delegacioni amerikan që pritet të mbërrijë në orët në vijim do të udhëhiqet nga zëvendëspresidenti J. D. Vance.
Autoritetet pakistaneze kanë ndërmarrë masa të forta sigurie në kryeqytet, duke bllokuar hyrjet kryesore drejt Zonës së Kuqe, ku ndodhen institucionet qeveritare. Prania e shtuar e policisë dhe ushtrisë, si dhe ngritja e pikave të shumta të kontrollit, kanë kufizuar ndjeshëm lëvizjen në qytet.
Takimet pritet të zhvillohen në Serena Hotel, një nga hotelet më të njohura në zonë, i cili është vendosur nën kontroll të plotë nga forcat e sigurisë. Vizitorëve u është kërkuar të largohen, ndërsa përgatitjet për takimin janë në fazën përfundimtare.
Këto bisedime zhvillohen në një klimë të tensionuar, ndërsa pritet të kenë ndikim në zhvillimet rajonale dhe marrëdhëniet mes dy vendeve.
