Një person i cili merrej me shpërndarje droge dhe shitje armësh, është vënë në prangat e efektivëve të policisë Tiranë.
Bëhet fjalë për një 27-vjeçar i cili ushtronte veprimtari kriminale në fushën e narkotikëve dhe shitjes e mbajtjes pa leje të armëve dhe municioneve.
Efektivët e komisariatit nr.2 pas denoncimit të ardhur në Komisariatin Dixhital se një person në rrugën “Irfan Tomini”, shiste drogë, armë luftarake dhe sportive, kanë organizuar punën për identifikimin, lokalizimin dhe kapjen e personit që ushtronte këtë veprimtari kriminale.
Si rezultat i reagimit të shpejtë dhe informacioneve të marra u bë i mundur identifikimi dhe kapja në flagrancë e G. D., 27 vjeç, banues në Tiranë.
Gjatë kontrollit të ushtruar në banesën e tij, shërbimet e policisë gjetën dhe sekuestruan në cilësinë e provës materiale një dorezë metalike, përforcues grushti, një shkop shufër metalike me tri hapje, një shkop gome me hapje si ata të policisë, një armë gjahu çifte dhe municion luftarak.
Ndaj të dyshuarit për ndjekje të mëtejshme, materialet iu referuan Prokurorisë së Tiranës për veprat penale “Prodhimi dhe mbajtja pa leje armëve të gjuetisë dhe sportive”, “Prodhimi, mbajtja, blerja apo shitja pa leje armëve të ftohta” dhe “Mbajtja pa leje e armëve shpërthyese dhe municioneve”.
g.kosovari
