JAVANEWS/ Këshilli i Europës ka publikuar së fundi sitatistika interesante për gjendjen e burgjeve në Europë. Shqipëria ndodhet në fund të listës (pesë vende nga fundi) sa i përket dendësisë së të burgosurve në sistemin e burgjeve, me 120 persona që vujane dënimin, për çdo 100 vende të disponueshme nëpër qeli. Mesatarja europiane është 94 të dënuar për 100 vende, shkruan Javanews.al.
Sipas raportit Shqipëria ka gjithashtu moshën më të re të të dënuarve: vetëm 26 vjeç, kurse mesatarja europiane është 33 vjeç.
Nga ana tjetër vendi ynë ka nëpër burgje 51.9% të personave që ndodhen aty në pritje të një vendimi të formës së prerë. Mesatarja europiane për këtë aspekt është 24.2%, çka tregon sa e ngadaltë është drejtësia shqiptare në dhënien e dënimeve.
Sa i përket numrit të të dënuarve në raport me popullsinë, Shqipëria ka sot në burg 187.8 persona për 100 mijë banorë. Mesatarja europiane është 124 të dënuar për 100 mijë banorë.
Një e dhënë tronditëse është ajo e numrit të të dënuarve për vrasje ose tentativë vrasje. Jemi vendi me mesataren më të larte në kontinentit europian. Plot 39.4% e atyre që ndodhen në burgjet shqiptare, janë aty për shkak të vrasjeve, ose tentativave për vrasje, ndërkohë që mesatarja europiane është vetëm 12%. Një diferencë që flet vetë.
