Batuta të shumta e kanë karakterizuar Konventën e grave të PS, ku janë shpërndarë karta të reja anëtarësimi. Kryeministri Edi Rama ka ftuar deputeten Arta Dade për të shpërndarë këto karta dhe i ka kërkuar të flasë për Pandeli Majkon dhe Gramoz Ruçin. Ndërsa Dade i ka kërkuar Ramës lule, pas 3 buqetave të shpërndara prej tij në mëngjes, kryeministri i ka thënë se deri në Kongres është ai karafil, duke supozuar kështu se mund të ketë zgjedhje për kreun e PS.

Rama: Thuaj dy fjalë për Pandin dhe Ruçin se mua mi thua veç.

Dade: Pandin e njoh që student, kam qenë shumë e rreptë. Anglishten e ka përmirësuar kur u bë kryeministër.

Ruçi për mua nuk ka qenë nursëz. Na ka mbështetur. Brenda rreptësisë së tij ka shumë mbështetje, ngrohtësi për ne gratë. Dua të falënderoj kolegët e mi. Buqetat që ke shpërndarë që në mëngjes, të na kishe hedhur nga një karafil nuk kishe bërë keq.

Rama: Deri në kongres karafil më ke mua.

Rama: Arta kur po fliste Pandi tha: Flet flet ky, por po të çohem t’i them që orën e parë i kam vënë 4, orën 2 prapë 4 dhe pastaj erdhi javës tjetër më mori 8-ën.

Dhe tjetrën për Ruçin, donte të më thoshte Arta: La nam me anglishten copë-copë, sa më tha social-demokrati se fjalët shqip i mora vesh por çfarë tha anglisht nuk e kuptova.

Më pas ndërsa në podium ka hipur një prej anëtareve të reja për të marrë kartën e anëtarësimit, ajo i është drejtuar Dades si ministre. Pas kësaj Dade tha se nuk ka ndonjë gjë të keqe dhe se ndoshta është koha për një ministre të brendshme.

“Ka ardhur koha për një ministre të brendshme pse jo. Jo se kam ndonjë vërejtje për ministrin”, tha ajo.

Po batutat kanë vijuar sërish dhe Rama i ka pohuar një anëtareje të re që ishte e emocionuar se “Unë jam dridhur më shumë se ty kur kam parë Artën për herë të parë”.