Chelsea do të luajë javën e ardhshme finalen e Europa League kundër Arsenalit, një mundësi e shkëlqyer për ta mbyllur sezonin me një trofe të rëndësishëm, që njëkohësisht do të vlente edhe kualifikimin në Champions League.
Megjithatë, prej javësh flitet se trajneri Maurizio Sarri do të largohet, aq sa vetë italiani ditët e fundit e ka humbur qetësinë, duke deklaruar për The Guardian: “Nëse e ardhmja ime varet nga fitimi ose jo i Europa League, më mirë të më pushojnë nga puna që tani”.
Natyrisht, pushimi nga puna ka një kosto jo të vogël, sepse trajneri italian dhe stafi i tij duhen dëmshpërblyer, por Roman Abramovich nuk është se e ka vrarë shumë mendjen në të shkuarën për gjëra të tillë.
Vetëm para pak ditësh Chelsea humbi gjyqin me Antonio Conten, i cili do të marrë 9 milionë sterlina nga Chelsea, për prishjen e parakohshme të kontratës.
Daily Mail ka përpiluar një listë të trajnerëve të pushuar nga puna dhe ka dalë në përfundimin se këto pushime nga puna i kanë kushtuar Chelseat 92.9 milionë sterlina në total, rreth 105 milionë euro.
Claudio Ranieri u pushua i pari në epokën Abramovich dhe mori 6 milionë sterlina kompensim, ndërsa Jose Mourinho u pushua në vitin 2007 dhe mor së bashku me stafin plot 23.1 milionë sterlina.
Avram Grant mori 5.2 milionë në 2008, Luiz Felipe Scolari 12.6 milionë dhe Carlo Ancelotti 6 milionë sterlina.
Në epokën aktuale André Villas-Boas ka marrë 12 milionë sterlina dhe Roberto Di Matteo 10.7 milionë. I pafat Rafa Benítez, i cili nuk mori asnjë kacidhe, sepse ishte trajner i përkohshëm kur u pushua nga puna.
Jose Mourinho u kthye dhe u pushua sërish pak vite më parë, duke marrë edhe 8.3 milionë sterlina, ndërsa Guus Hiddink doli duarbosh, sepse ishte trajner i përkohshëm, ashtu si Benitez./telesport
g.kosovari
