“Ky libër me poezi, kjo poemë elegjiake, me të katër pjesët e saj, i këndon humbjes, asaj të përgjithshmes dhe asaj vetjakes, asaj të përbotshmes dhe asaj të përveçmes, asaj të priturës…” – kështu e përshkruan gazetarja Monika Stafa vëllimin me poezi “Shi me Baltë” të Mero Bazes, në programin “Vitrina e Librit.”
Gjatë intervistës, autori theksoi se poezia e tij nuk është mirëfilli produkt i një laboratori krijues, por i përjetimeve vetjake. “Është një poezi që mbështetet mbi gjërat që unë kam përjetuar dhe kjo është edhe arsyeja që po pëlqehet. Shumica e asaj që quhet produkt letrar sot, është më shumë një formë meditimi dhe përpjekje për sofizma intelektuale,” u shpreh Baze.
Në vijim, ai ndau shqetësimin e tij lidhur me ndikimin e kulturës së konsumizmit tek të rinjtë sot – një temë që pasqyrohet edhe në poezinë e tij. “Ne duhet t’i kthejmë brezat e rinj me këmbë në tokë. Duhet t’i kthejmë atje ku ne e kemi nisur. Të gjitha këto që shohim sot – krimet në rrugë, vrasjet – vijnë mes të tjerash nga fakti se po rritet një brez pa fëmijëri. Një brez pa dashurinë për njerëzit e afërt, për familjen, për vendin ku kanë lindur, për mënyrën se si janë rritur. Po rritet një brez konsumist, të cilët mendojnë se të kesh ca lekë është më e rëndësishme se çdo gjë tjetër. Thelbi i kësaj, është për t’i ballafaquar ata [të rinjtë] me vlerat me të cilat jemi rritur dhe të cilat, edhe për fajin tonë, ata nuk i gjejnë më.”
Përmes këtyre reflektimeve, “Shi me Baltë” bëhet jo vetëm një vëllim poetik, por edhe një thirrje për të rikthyer vlerat e humbura në një shoqëri që duket se po i largohet gjithnjë e më tepër rrënjëve të saj.
