Në Ditën Botërore kundër Punës së Fëmijëve, UNICEF i bën thirrje qeverisë shqiptare të marrë masa për reduktimin e saj, pasi vetëm kështu fëmijët mund të mos lihen pas dore. Sipas kësaj organizate, në vendin tonë numri i të vegjëlve që punojnë ose lypin në rrugë dhe që janë objekt i formave më të këqija të shfrytëzimit mbetet i lartë, ndonëse të dhënat për këtë fenomen mbeten të kufizuara. Ndërkaq, duke analizuar shkaqet kryesore të rrënjosura në rrethin vicioz të varfërisë, UNICEF-i ka identifikuar se fëmijët punojnë për shumë arsye.
“Varfëria dhe nevoja që fëmijët të kontribuojnë në ekonominë familjare janë faktorë madhorë. Megjithatë, mungesa e mundësive për arsimim dhe cilësia e dobët e sistemeve shkollore, si edhe diskriminimi ndaj fëmijëve që u përkasin grupeve të veçanta sociale veprojnë gjithashtu si shtysë për fëmijët që të angazhohen në punë. Pa pasur mundësi për arsimim, shpesh fëmijët kanë pak alternativa dhe si pasojë fillojnë të punojnë që në moshë të hershme”, thuhet në deklaratën e kësaj organizate.
Ndërkaq, përfaqësuesja e UNICEF, Antonella Scolamiero, e vë theksin tek arsimi gjithëpërfshirës, si mënyra më e mirë për parandalimin e këtij fenomeni.
“Puna e fëmijëve është e papranueshme sepse fëmijëve të vegjël u mohohet e drejta për arsim dhe ata detyrohen të përfshihen në format më të rrezikshme të punës. Fëmijët që punojnë, mungojnë në shkollë dhe lihen pasa dore, pa pasur një mundësi për një të ardhme më të mirë. Ne në UNICEF besojmë se strategjia më efektive për të parandaluar punën e fëmijëve është së pari nëpërmjet rritjes së aksesit në arsim cilësor dhe gjithëpërfshirës”, shprehet Scolamiero.
Shifrat
Ndërkaq, ndonëse shifrat në vendin tonë janë të pakta, studimi kombëtar “Fëmijët që punojnë në Republikën e Shqipërisë”, realizuar nga Instituti i Statistikave dhe Organizata Botërore e Punës (ILO) ka arritur në përfundimin se janë plot 54000 fëmijë që punojnë, ndërkohë që 35500 prej tyre bëjnë punë të rrezikshme. Studimi mbuloi 7319 familje që përmbanin 27865 individë, nga të cilët 6003 ishin fëmijë të moshave 5-17 vjeç.
Ai u realizua në vitin 2010, por të dhënat e përpunuara janë prezantuar përgjatë vitit 2013. Sipas tij, 54 000 fëmijë ose 8.2% e 5-17 vjeçarëve janë ekonomikisht aktivë, ndërkohë që 80% e fëmijëve që punojnë janë të angazhuar në aktivitete bujqësore. Tregtia me shumicë dhe pakicë si dhe hotelet e restorantet kanë punësuar respektivisht 8.2% dhe 4.15% të fëmijëve. Kjo do të thotë se këto tri aktivitete kanë punësuar mbi 90 për qind të fëmijëve që punojnë. Sa u takon vështirësive në punë, studimi vlerëson se 65.8% e fëmijëve që punojnë, bëjnë punë të rrezikshme.
BW/d.i.
