Vëllezërit Bushgjokaj, Kristi, Fation dhe Aleksandër janë futur në izolim pas sherrit brenda kafazit në seancën gjyqësore, me Petrit Çakri.
Gjatë seancës së radhës këtë të premte ata kanë pretenduar se Petrit Çakri i ka provokuar.
Vëllezërit janë futur në izolim ndërsa i kërkuan ndjesë gjykatës dhe prokurorisë për incidentin.
Ata kërkuan ndryshim mase sigurie, kërkesë që u rrëzua.
I pari që ka nisur konfliktin ishte Kristi Bushgjoka, i cili goditi Petrit Hoxhën, i njohur edhe me mbiemrin Cakraj.
Shkak për sherrin u bë deklarata e Petrit Hoxhës, i cili implikoi vëllezërit në vrasjen e Renis Dobrës, duke mohuar përfshirjen e tij në këtë ngjarje.
Në konflikt janë përfshirë edhe dy vëllezërit e tjerë, Aleksandër dhe Fation Bushgjokaj, duke goditur me grushte dhe shkelma Petritin. Në kafaz kanë qenë 5 punonjës policie. Situata është e përsëritur, ka ndodhur edhe më herët në seancat e tjera paraprake.
Tre vëllezërit, Fation, Aleksandër, Kristi Bushgjokaj dhe Petrit Hoxha akuzohen për rrëmbimin dhe vrasjen me litar të Renis Dobrës, më 8 korrik 2025.
Në bashkëpunim me njëri-tjetrin kanë organizuar rrëmbimin dhe vrasjen e 23-vjeçarit Dobra, të cilin pasi e vranë me litar e hodhën bashkë me makinën e tij buzë liqenit të Shkopetit.
Renis Dobra ka qenë i dënuar në Gjermani për shpërndarje të lëndëve narkotike, duke bërë disa muaj burg, nga ku më pas u deportua drejt Tiranës. Konflikti me 3 vëllezërit dhe Petrit Çakrrin dyshohet se ka ardhur pasi Dobra ka tentuar t’i mashtrojë disa herë për sasitë e lëndëve narkotike, detaje që me sa duket u kuptuan nga grupi kriminal.
