Kur na ndajnë veç pak ditë nga zgjedhjet, vijon të rritet tensioni mes dy kampeve politike si dhe presioni për votat.
Vëllai i deputetit të PD Bledion Nallbati, Altin Nallbati, është bërë sërish subjekt i një konflikti që ka përfunduar në dhunë.
Ai është përplasur me dy vëllezër në Devoll ku kishte shkuar për t’i kërkuar llogari për mos pjesmarrjen në mitingjet e kandidatit të koalicionit Bashkë Fitojmë, Elvis Hajdërlli.
Pasi kishte shkuar në njësinë administrative Miras, ai është afruar në vendin ku qëndronin dy vëllezërit Olivert dhe Blerti Zaçi.
Konflikti ka nisur fillimisht me tone të larta e me fyerje ndaj vëllezërve dhe më pas agravoi më tej.
Të gjendur mes debateve dhe sulmit, dy vëllezërit janë kundërpërgjigjur duke e dhunuar dhe dëbuar.
Të pranishmit janë afruar për t’i ndarë dhe për të shmangur agravimin e mëtejshëm.
Kandidati Hajdërlli ka zgjedhur mos reagojë për këtë konflikt që shkaktoi jo pak panik te banorët e zonës.
Kjo nuk është hera e parë që vëllai i deputetit të PD bëhet qendër e kronikës së zezë gjatë zgjedhjes ku herë pas here ka shënuar konflikte si dhe denoncime për shit-blerje votash.
Më herët, Nallbati është akuzuar edhe për tentativë vrasje nga dy motra në Bilisht të cilave u është diegur makina në rrethana të dyshimta./m.j
