Byroja Parlamentare u mbodh pasditen e së enjtes, për të marrë një vendim pas situatës së tensionuar që ndodhi sot në Kuvend midis deputetit socialist, Erion Braçe dhe deputetit demokrat, Sali Berisha.
Pas mbledhjes së Byrosë së Kuvendit, nënkryetari i Kuvendit, deputetit i PD-së, Edmond Spaho tha se, “kemi kërkuar largimin e deputetit Braçe për 10 ditë”. Ndërsa, ai paralajmëroi se opozita nuk do të marrë më pjesë në Byronë e Kuvendit, pasi ajo nuk është më produktive.
Ai tha se mazhoranca kërkoi kohë për të shqyrtuar çështjen. “Fjalori i Braçes ishte pjesë e një qëndrimi arrogant, por është një sjellje e përsëritur e këtij deputeti ndaj kolegëve të palës tjetër. Ky deputet i është drejtuar me fjalor fyes deputetëve, por byroja i hodhi poshtë këto pretendime me argumentin se nuk kemi prova filmike. Ata thanë se duhet kohë për ta shqyrtuar ngjarjen dhe të marrin një vendim. Duan kohë më shumë”, tha Spaho.
Sipas tij, “tolerimi i akteve të tilla, siç ka ndodhur në të shkuarën, çojnë në përshkallëzimin e këtyre ngjarjeve”. “Kushdo që thyen rregullin duhet të ballafaqohet me masat. Por qëndrimi i mazhorancës ishte në përkrahje të deputetëve të vet. Ne shprehëm pakënaqësinë tonë që Byroja e Kuvendit, megjithëse i kishte të gjitha provat nuk dhanë vendim. Ne vendosëm që është e pavlerë të marrim pjesë në mbledhjet e Byrosë. Unë nuk do marr më pjesë në mbledhjen e Byrosë së Kuvendit”, tha ai.
Ndërsa deputeti socialist, Fatmir Toçi tha pas mbledhjes së Byrosë së Kuvendit se seanca parlamentare që u ndërpre për shkak të sherrit, do të shtyhet deri sa Byroja të marrë një vendim për këtë incident. Toçi kërkoi përjashtimin e deputetëve demokratë, Sali Berisha, Edi Paloka dhe Roland Keta.
“Seanca e Kuvendit shtyhet deri sa byroja të marrë vendim. Kërkuam përjashtimin e Berishës, Palokës dhe deputetit Keta”, tha Toçi.
