Një sherr i nisur në një lokal në Kamëz mbrëmjen e së hënës ka sjellë pezullimin nga detyra të dy punonjësve të policisë, nën dyshimet për mosveprim. Protagonist në këtë ngjarje është edhe një efektiv i FNSH-së, i cili ndërhyri për të shuar konfliktin, ku ishte i përfshirë një prej shokëve të tij, me të cilin po konsumonte kafe.
Mësohet se efektivi i FNSH-së, i cili ndodhej jashtë shërbimit, ishte në lokal me dy persona të tjerë. Në ambientet e lokalit kanë hyrë disa persona, të cilët janë konfliktuar fizikisht me një prej personave që ndodhej në tavolinë me efektivin. Punonjësi i policisë ka ndërhyrë për t’i ndarë, ndërsa policia është njoftuar nga dëshmitarë okularë.
Rasti është trajtuar nga hetuesit si konflikt banal, ndërsa dy oficerë të Policisë së Kamzës janë pezulluar nga detyra deri në sqarimin e plotë të rrethanave, pasi dyshohet se nuk kanë vepruar për identifikimin e të gjithë personave të përfshirë në ngjarje. Në hetime është përfshirë edhe AMP-ja, ndërsa po verifikohen pamjet e kamerave të sigurisë për zbardhjen e plotë të ngjarjes.
