Mënyra e marrjes së shërbimeve në sportelet e administratës publike do të ndryshojë. Lajmi është bërë i ditur nga Ministrja për Inovacionin dhe Administratën Publike, Milena Harito gjatë një seminari të zhvilluar në Tiranë për prezantimin e praktikave më të mira europiane për shërbimet publike. Në seminarin ku ishin ftuar ekspertë të fushës nga Belgjika, Italia, Polonia dhe Rumania merrnin pjesë edhe ambasadorja e BE në Tiranë, Romana Vlahutin dhe ambasadori Italian Massimo Gaiani.
Duke folur për hapat e deritanishëm të reformës, Ministrja Harito ka prezantuar modelin e ri të formularit që do të përdoret në institucionet shtetërore për të marrë shërbime në sportel. Sipas saj ky model formulari shmang procedurat e ndryshme që aplikojnë institucione të ndryshme për dhënien e shërbimeve ndaj qytetarëve. Është një dokument që e ka çdo administratë e vendeve të BE-së.
Formulari i ri do të përdoret fillimisht në sportelet e 15 institucioneve shtetërore dhe do të përfshijë dhënien e 280 shërbimeve. Ndër institucionet e përfshira nga kjo reformë do jenë Hipoteka, ALUIZNI, Agjencia e Kthimit të Pronave, Zyrat e Punës, Instituti i Sigurimeve Shoqërore, Agjencia Kombëtare e provimeve etj.
“Standardizimi i procedurave dhe i shërbimeve është një nga mënyrat për të përmirësuar shërbimin dhe për të luftuar korrupsionin. Dhe një rezultat i parë që mund të tregojmë sot është ky formular, që duket në pamje të parë si një gjë shumë e thjeshtë, por që është diçka që ka kërkuar disa muaj punë me mbështetjen e ekspertëve të Bashkimit Europian dhe sipas standardeve më të mira europiane”, ka thënë Harito në fjalën e saj.
Sipas ministres qëllimi është që të ngrihet një sistem për ofrimin e integruar të shërbimeve publike, sepse kjo gjë nuk mund të lihet në preferencën e institucioneve dhe as të ndonjë zyrtari që tenton të bëjë korrupsion. “Që nga momenti që ngrihen sisteme të tilla, që kodifikojnë në mënyrë shumë të qartë gjithë procesin që do të ndjekë qytetari për të marrë shërbimin, që në këtë moment i pritet rruga korrupsionit”, ka theksuar Harito.
