Kishte shumë njerëz sot në memorialin e viktimave të Srebrenicës, për të përkujtuar një ndër masakrat më të përgjashkme të Europës së pasluftës. Më shumë se 8000 civilë boshnjakë u vranë mizorisht nga serbët boshnjakë, në një akt të pastër spastrimi etnik e fetar. Dy dekada më voë, ajo masakër vijon të zhurmojë në mendjet e mbarë botës. Prezenca e liderëve politikë nga e gjithë Europa dhe bota, ishte manifestimi i nderimit për të vrarët e asaj masakre, por edhe një rinovim i mesazhit të fuqishëm që përçon kjo ngjarje, me përmasën e saj tragjike.
Srebrenica, precedenti i saj makabër, “flet” çdo gjuhë të botës. Njëzet vjet më pas, fatin e burrave e fëmijëve muslimanë të kësaj pjese të Bosnjes, e pësojnë çdo ditë popullsitë civile në Siri e Irak. Fati tragjik i jazidëve në malet e Irakut, të cilët po masakrohen nga falangat e Shtetit Islamik, dëshmon se fara e së keqes që mbolli vdekje në Srebrenicë, është ende gjallë. Konflikti i sotëm në botën arabe, ushqehet nga të njëjtat instikte të ulëta vrastare, të cilat vunë në lëvizje Srebrenicën. Në këtë sens, dy dekada më vonë, Srebrenica vijon të flasë me gjuhën e saj të tmerrit dhe urrejtjes në çdo cep të botës./S.M/
