Kreu i opozitës duket se e ka përdorur udhëtimin në Bruksel, menjëherë pas zgjedhjeve, për të larguar disi stresin e fushatës, por edhe mendimet e këqia që i kanë sjellë në kokë rezultatet dëshpëruese. Ai njoftoi se ka ardhur nga qendra e Europës me një mision të ri politik: të ndreqë të gjitha paudhësitë që sipas tij, janë vënë re në zgjedhjet e fundit. E që kanë të bëjnë me para të blera, kandidatë të inkriminuar, vjedhje votash e qeveritarë të korruptuar.
Gjithçka mund të jetë e saktë në listën e zotit Basha. Ose të paktën, ne s’kemi pse ta paragjykojmë nismën e tij ende pa nisur. Por që të rreshtosh të gjitha arsyet e botës, e të mos thuash asnjë fjalë për mënyrën sesi u drejtua fushata, sesi dhe sesa u angazhuan strukturat e PD në zgjedhje, si u zgjodhën kandidatët, sa efikas ishte turi i kryetarit dhe më gjerë akoma, lidershipi i tij në këto zgjedhje – kjo do të thotë thjesht dhe vetëm t’i shmangesh përgjegjësisë për 21 qershorin.
Opozita i humbi zgjedhjet kryesisht për faj të saj, për mosorganizimin, moskrijimin e frymës dhe paaftësinë për të gjetur strategjinë dhe taktikën e duhur elektorale, për të përballuar një dyshe politike që sot duket e pathyeshme. Lulzim Basha doli i dobët nga gara dhe motivet e dobësisë duhet t’i kërkojë më së pari tek vetja.
