Partia Demokratike do të bojkotojë zgjedhjet vendore që dotë mbahen në Kurbin. Është vetë Kreu i Grupit Parlamentar të PD Edi Paloka i cili në një mbledhje partie të mbajtur në Kurbin ka bërë të ditur se PD nuk mund të futet në zgjedhje dhe faji për këtë është i dyshes Rama-Meta.
Sipas Palokës, mos regjistrimi i Ilir Pjetraj si kandidat i opozitës, edhe pse i kishte kaluar afati i regjistrimit, është vepër e dyshes së mazhorancës. Paloka nuk është ndalur me kaq, por u ka bërë thirrje të gjithë banorëve që të mos votojnë në 21 Qershor.
“PD do të bojkotojë zgjedhjet në Kurbin. Kjo për faktin se ato i dëmtoi dyshja Rama-Meta. I bëj thirrje banorëve të mos votojnë më 21 Qershor.” mësohet të ketë thënë Paloka në mbledhje.
Megjithatë kjo thirrje e PD ngjan si “deja vu”. Kjo për faktin se prej kohësh disa zëra “dashakeqë” flasin për një bojkotim të mundshëm të zgjedhjeve nga ana e selisë blu.
Nuk dihet se sa të vërteta janë këto zëra, dhe a do të jenë si pasojë e rezultateve në zgjedhje, por bojkoti nuk duket të jetë zgjidhja më e mirë për PD.
Në fakt shqiptarët dhe Shqipëria nuk ka nevojë për një bojkot të zgjedhjeve që do të jepte një mesazh jo të mirë për vendin në sytë e qytetarëve në radhë të parë, dhe po ashtu edhe në sy të ndërkombëtarëve.
