Nga Lorenc Vangjeli
Politika dhe fyerjet reciproke
Natyrisht që do të flitet sërish për kod etike. Edhe mund të nënshkruhet një i tillë, qoftë në Kuvend për të qenë në përdorim për shumë kohë, qoftë për këtë fushatë për përdorim të përkohshëm. Por edhe kjo nuk do të ndryshojë ndonjë gjë të madhe. Asnjë nga fjalët e forta të fjalorit buçitës së shqipes nuk do të mungojë as në këtë fushatë. Palët do t’i drejtohen njëra-tjetrës sipas zakonit, do të hedhin dhe do të presin nga njëri shesh në tjetrin, nga njëri ekran në tjetrin deri në ditën e heshtjes zgjedhore dhe do të rinisin sërish menjëherë mbas saj. Sipas motivit të vjetër politik vendas: Selanik e tatëpjetë, siç ka qenë, do të jetë!
Vetëm në 24 orët e fundit u kujtuan histori me krevate nga Rama për një kandidate, i tregoi Berisha Junior Ramës histori me krevat, sulet edhe Paloka me tërsëllëmë, natyrisht kundër Ramës me fjali nga katet e ulëta të fjalorit, Rama i përgjigjet me pjesën e sipërme të mësimeve kristiane: mëshirën. Shfaqen emra perimesh, mbiemra si nofka, nofulla të shtrënguara dhe gjithmonë gjuhë të lëshuara. Në këtë rrjedhë nuk klasifikohet Doktor Berisha sepse, siç pohohet gjerësisht, ai duket sikur shan me listë të gjendjes civile, edhe kur thotë mirëdita! E shara dhe fyerja është gjendja natyrale e Doktorit që tani është dashuruar pafund me lëmin e të dashuruarve Facebook.
Kështu do të vazhdojë deri në datën 19 qershor, mesnatën e të premtes duke u gdhirë e shtuna. Gjithmonë duke harruar që shpesh zëri i ulët dhe qetësia e shtruar, buçet më shumë në mes të kakofonisë së zhurmave . (Çfarë tingulli kanë disa fjalë të shqipes!!! Buçet… Edhe kjo ngjan si sharje politike e mirëfilltë ose në rastin më të mirë, si një mbiemër politik).
