Dy persona kanë humbur jetën ditën e sotme, duke punuar në minierën e Artanës, e cila ndodhet 40 km në lindje të Prishtinës. Brenda në minierë është shembur blloku në hiorizontin e pestë. Drejtori i miniserës, Selim Frangu bëri me dije, se 2 punëtorë humbën jetën, ndërsa 21 të tjerë u nxorrë të gjallë. Ai sqaron, se viktimat ishin njëri inxhinier dhe tjetri xehetar.
“Kemi një aksident brenda në minierë, kemi një shembje të një blloku në horizontin e pestë dhe fatkeqësisht kemi dy viktima. 21 punëtorë kanë qenë në minierë, të gjithë janë jashtë përveç atyre dy viktimave. Njëri prej viktimave është inxhinier ndërsa tjetri xehetar”, i tha Zërit të Amerikës, drejtori i minierës së Artanës, Selim Frangu.
Në lidhje me ngjarjen e rëndë ka reaguar edhe Presidenti Hashim Thaçi. Kreu i Shtetit kosovar u ka shprehur ngushëllime familjarëve dhe të afërmve të viktimave. Më tej ai u ka bërë thirrje institucioneve të kosovës, që të bëjnë më shumë kujdes për punëtorët.
“Thellësisht i pikëlluar me humbjen e jetës së dy punonjësve në Minierën e Artanës, si pasojë e shembjes së dheut. U shpreh ngushëllime të thella familjeve, të afërmve dhe gjithë kolegëve të tyre. Institucionet e Kosovës duhet të përkujdesën që punëtorët të jenë gjithmonë të mbrojtur në vendet e tyre të punës! HTH”, shkruan Thaçi.
g.kosovari
