Inspektorati i Mbrojtjes së Territorit ka shembur në orët e para të mëngjesit të sotëm banesën e dytë në Shkozë, ndërkohë që vijon aksioni për shembjen e një banese tjetër.
Banorët nuk kanë krijuar tension ashtu sikurse një ditë më paë, ndërsa e gjithë zona është rrethuar nga policia dhe FNSH, për të garantuar mbarëvajtjen e aksionit.
Banesat preken nga devijimi i Lanës në kuadër të projektit të Unazës së Re. Një ditë më parë u shemb edhe një banesë tjetër, pavarësisht kundërshtimit të banorëve.
Ish-deputeti i PD, Aldo Bumçi thotë se ajo që po ndodh me banesat në Shkozë është një kafshëri.
Nga Shkoza, ku opozita është në mbështetje të banorëve, Bumçi thotë se kjo qeveri nuk ka lidhje me Evropën.
“Kemi 3 shtëpi qe kanë legalizim dhe dy të tjerë nuk kanë. Legalizimin e bën shteti, po të prishi shtëpinë do të japë ose shtëpi ose lekë.
Banorët kërkojnë minimalen, të kenë mundësi të fusin kokën diku tjetër. Në asnjë vend të botës nuk nxirret qytetari në mes të 4 rrugëve
Kjo sjellje e kësaj qeverie çfarë lidhje ka me Evropën? Kjo është një kafshëri që ndodh ditën për diell.
Shanset në bazë të konventës evropiane të të drejtave të njeriut kanë 100%, por ky njeri nuk do. Jep 20 mln euro për 1 km rrugë dhe nuk dëmshpërblen. Nuk mund të prishet shtëpia pa dhënë lekë.
Ky njeri nuk pyet për pronën, për të drejtën themelore. Është kjo kafshëri në mes të Evropës. Kjo gjë nuk ndodh në asnjë vend.
Duhet të ngrihemi, të shkojmë para kryeministrisë dhe ta largojmë që aty.
Ka qenë kryeministër, Fatos Nano, Majko, Meta dhe nuk janë prishur shtëpi. Kjo është diktaturë!”, deklaroi Bumçi.
g.kosovari
