Ka institucione që e sfidojnë buxhetin e presidencës dhe një i tillë është Telecom. Zyrtarët më të lartë të vendit, edhe pse udhëheqin fatin e shtetit, presidenti, kryeministri, ministrat , nuk janë ndër zyrtarët më të paguar në Kosovë.
Janë vartësit e tyre, udhëheqësit e ndërmarrjeve publike dhe agjencive të ndryshme të cilët paguhen deri në 6 mijë euro në muaj.
Për shembull, presidenti i vendit, Hashim Thaçi, nuk mund të shtyhet me kryeshefin ekzekutiv të Telekomit të Kosovës (TK), Agron Mustafa, pasi ky i fundit në vit merr pagë vjetore mbi 50 për qind më shumë se shefi i shtetit.
Mustafa, edhe pse çdo vit ka rënie të fitimeve të PTK-së, në Agjencinë Kundër Korrupsion (AAK) ka deklaruar pagë mujore nga Telekomi i Kosovës në vlerë prej 5 mijë e 182 euro dhe pagën e kolegjit privat AAB, 1 mijë e 200 euro. Paga vjetore e kryeshefit të PTK-së e tejkalon vlerën prej 70 mijë euro. Ndërsa i pari i vendit në vit realizon të hyra nga paga 34,478.00 euro.
Nuk mund të anashkalohet as kryeshefi i Postës së Kosovës, Sejdi Hoxha, i cili pavarësisht sfidave që ka me performancën e dobët të kompanisë ku mbi 90% e të hyrave shkojnë në paga. Ai në vit nga dy pagat që i ka deklaruar në Agjencionin Kundër Korrupsion merr 39 mijë euro.
Vështirësi dhe performancë të dobët ka kohë që ka edhe Agjencia Kosovare e Privatizimit (AKP), ku si pasoj e dobësive të menaxhimit Kuvendi i Kosovës këtë vit nuk i ka miratuar raportin e vitit paraprak.
Por kjo nuk ka ndikuar në uljen e pagës të udhëheqësve të saj, ish drejtori menaxhues Avni Jashari, në vit sipas deklarimit të tij në AKK, merr pagë 50,295.00 euro.
Mbi 32 mijë euro të hyra vjetore nga pagat i ka deklaruar se i merr edhe kryeshefi ekzekutiv i Korporatës Energjetike të Kosovës (KEK) Arben Gjuka.
Ai në vit i merr pagë 28,963.0 euro vetëm nga KEK-u, ndërsa merr edhe 4,800.00 euro pagë nga universiteti privat UBT. Por nuk mbaron këtu, veçse publiku s’shtë shumë i interesuar t’i dëgjojë. (b.an)
