Financial Times raporton për një plan që do t’i kushtëzonte garancitë e sigurisë për Ukrainën me dorëzimin e territoreve në Lindje, por Shtëpia e Bardhë e cilëson lajmin “krejtësisht të pavërtetë”.
“Tërheqja nga Donbasi është rruga drejt paqes për Ukrainën”, shkroi në platformën X negociatori rus Kirill Dmitriev, duke përsëritur qëndrimin e njohur të Moskës për dorëzimin e territoreve të aneksuara në mënyrë të njëanshme. Rusia prej muajsh kërkon që Kievi t’i njohë këto rajone, të cilat në terren i kontrollon vetëm pjesërisht.
Shtëpia e Bardhë e mohoi kategorikisht këtë version. “Është totalisht e rreme. Roli i vetëm i Shteteve të Bashkuara është të ndihmojnë palët të arrijnë një marrëveshje paqeje”, deklaroi zëvendës-zëdhënësja Anna Kelly, duke akuzuar gazetën britanike për publikimin e pretendimeve anonime që dëmtojnë procesin e paqes. Presidenti Donald Trump u shpreh vetëm se “po ndodhin gjëra shumë pozitive”.
Megjithatë, zëdhënësi i Kremlinit, Dmitrij Peskov, ka përmendur vazhdimisht të ashtuquajturën “formula e Anchorage”, e cila sipas mediave ndërkombëtare parashikon dorëzimin e të gjithë Donbasit Rusisë, përfshirë pjesën e Donetskut ende nën kontroll ukrainas, në këmbim të ngrirjes së vijës së frontit në Zaporizhzhia dhe Kherson.
Presidenti ukrainas Volodymyr Zelensky nuk ka reaguar drejtpërdrejt ndaj këtyre raportimeve. Ai deklaroi më herët se një dokument amerikan për garancitë e sigurisë për Ukrainën ishte “100 për qind gati”, ndërsa së fundmi theksoi se anëtarësimi në Bashkimin Evropian mbetet një nga garancitë kryesore të sigurisë për vendin, me synimin për t’u bërë pjesë e BE-së në vitin 2027.
Ndërkohë, Moska vijon të dërgojë sinjale force. Shefi i Shtabit të Përgjithshëm rus, Valerij Gerasimov, vizitoi trupat në Ukrainën Lindore, duke deklaruar se ushtria ruse po avancon “në të gjitha frontet” dhe se që nga fillimi i janarit ka pushtuar 17 vendbanime dhe mbi 500 kilometra katrorë territor ukrainas. Mesazhi i Kremlinit mbetet i qartë: nëse nuk arrihet një zgjidhje diplomatike, Rusia do të synojë objektivat e saj me mjete ushtarake.
