Një çift i moshuar shqiptarësh është shpallur në kërkim në Shtetet e Bashkuara të Amerikës, pasi akuzohen për përfitime të mëdha parash në rrugë ilegale. Të gjendur midis një liste prej 25 personash, ata kanë arritur të përftojnë nga shteti Orange County një shumë prej 32 mijë dollarësh.
Sipas mediave lokale amerikane, bëhet fjalë për Palë dhe Katrine Kronaj, 84 dhe 74 vjeç.
Po sipas tyre, çifti në fjalë ka udhëtuar nga Shqipëria drejt Shteteve të Bashkuara të Amerikës për të marrë përfitime financiare publike që kapnin shifrën e më shumë se 32 mijë dollarëve.
Përfitimet financiare (Pulla Ushqimore), të cilat administroheshin përmes Departamentit të Shërbimeve Sociale të Orange County-t, kryesisht ishin pjesë të Programit të Asistencës Ushqimore Shtesë.
Teksa është lëshuar një urdhër për arrestimin e tyre, vendndodhja e çiftit Kronaj mbetet e panjohur. Mediat lokale shkruajnë se në skemën e mashtrimit, që i ka shkaktuar Orange County-t një dëm prej 275 mijë dollarësh, janë përfshirë edhe 23 persona të tjerë. (Shqiptarja.com)
