Zëvendës Sekretari amerikan i Shtetit Stephen Biegun u takua me lideren e opozitës në Bjellorusi, Svetlana Tikhanovskaya të hënën në Vilnius, por ky takim nënvizoi ai nuk duhet të shihet si ndërhyrje e Shteteve të Bashkuara në procesin politik në vendin e saj, pasi SHBA nuk ka ndërmend ta bëjë.
“Kam pasur një shans të takohem me zonjën Tikhanovskaya; ajo është një person shumë mbresëlënës dhe unë munda ta kuptoj pse është kaq popullore në vendin e saj”, u tha Biegun gazetarëve.
“Qëllimi i takimit ishte të dëgjoja e kuptoja se cili është mendimi për qytetarët në Bjellorusi dhe të shohim se çfarë po bëjnë për të marrë të drejtën e vetëvendosjes”, tha ai.
Sipas diplomatit, administrata amerikane dënon dhunën kundër protestuesve paqësorë në Bjellorusi dhe i bën thirrje qeverisë që të lirojë të gjithë të burgosurit politikë, por i takon popullit bjellorus të vendosë rrjedhën e ngjarjeve në vendin e tyre.
“Shtetet e Bashkuara nuk mund dhe nuk do të vendosin rrjedhën e ngjarjeve në Bjellorusi. Kjo është e drejta e popullit bjellorus siç është parashikuar në statutin e Kombeve të Bashkuara për të drejtat e njeriut dhe gjithashtu në statutin e OSBE-së,” tha zv / sekretari i shtetit amerikan.
“Bjellorusët kanë këtë të drejtë dhe atyre nuk iu dha kjo e drejtë më 9 gusht.
Kështu që këndvështrimi ynë është që gjëja më e mirë që mund të bëjmë është të mbështesim popullin në Bjellorusi, por në fund të fundit varet nga ata që të përcaktojnë të ardhmen e tyre dhe ne do ta respektojmë atë”, shtoi ai.
Biegun tha se ai e diskutoi situatën në Bjellorusi edhe me Ministrin e Jashtëm lituanez, Linas Linkevičius.
“Në fund të fundit kjo është një çështje që duhet ta vendosë populli bjellorus, por një shqyrtim dhe diskutim i menduar midis nesh ishte mjaft i dobishëm për të kuptuar ne situatën në rajon”, tha ai.
Liderja e opozitës bjelloruse, Tikhanovskaya falënderoi sekretarin Biegun për mbështetjen e SH.B.A.-së ndaj “popullit te vendit te saj që kërkon respekt për zgjedhjen e tyre”.
“Zgjedhjet e 9 gushtit nuk ishin as të lira dhe as të ndershme. Lukashenko nuk ka mbështetjen e popullit Bjellorus ose të bashkësisë ndërkombëtare. Çdo ditë ai nuk do të pranojë vullnetin e popullit të tij thjesht zgjat krizën dhe e thellon atë”, thuhet në një njoftim për shtyp të lëshuar në Vilnius nga liderja e opozites.
Tikhanovskaya tha se ishte e gatshme “për të zgjidhur krizën” duke u përfshirë në një dialog “mbi një transferim paqësor të pushtetit”.
“Ne gjithmonë kemi thënë që ne jemi të gatshëm të flasim dhe jemi të përkushtuar për një zgjidhje paqësore. Ne jemi të hapur për ndërmjetësimin e organizatave ndërkombëtare për të lehtësuar dialogun. Gjithashtu, ne kërkojmë një hetim të paanshëm të krimeve të kryera nga autoritetet Bjelloruse”, tha Tikhanovskaya.
“Në të njëjtën kohë, ne u bëjmë thirrje të gjitha vendeve të respektojnë sovranitetin dhe integritetin territorial të Bjellorusisë. Vetëm njerëzit e Bjellorusisë do të vendosin të ardhmen e tyre në zgjedhje të reja të drejta dhe të lira,” shtoi ajo.
g.kosovari
