Shtetet e Bashkuara po përgatisin një iniciativë të re diplomatike për të arritur një armëpushim afatgjatë në Ukrainë.
Steve Uitkoff dhe Jared Kushner, figura shumë pranë presidentit amerikan Donald Trump, pritet të udhëtojnë së shpejti në Moskë për bisedime me Kremlinin. Lajmi është konfirmuar nga këshilltari i Vladimir Putinit, Yuri Ushakov, ndërsa edhe qeveria ukrainase është në dijeni të kontakteve të reja mes palëve.
Sipas burimeve politike amerikane, objektivi i Uashingtonit nuk është një marrëveshje paqeje përfundimtare, pasi kushtet për të nuk ekzistojnë ende, por një armëpushim pa afat të caktuar, që do të ngrinte luftimet përgjatë vijës aktuale të frontit. Modeli që po merret si bazë është armëpushimi treditor i muajit maj, gjatë festimeve të 9 Majit, kur Ukraina pranoi të ndalte përkohësisht luftimet pas presionit amerikan dhe premtimit rus për lirimin e një mijë të burgosurve ukrainas.
Administrata Trump duket se po zhvillon negociata më shumë në koordinim me Moskën sesa me aleatët evropianë ose vetë Kievin. Një nga sinjalet më të forta është vendimi për të tërhequr rreth pesë mijë ushtarë amerikanë nga Europa, një lëvizje që shihet si lëshim ndaj Putinit për të krijuar klimë më të favorshme për armëpushimin.
Rusia prej fillimit të luftës e ka paraqitur konfliktin si përballje me NATO-n dhe Kremlini mund ta përdorë këtë tërheqje si fitore politike.
Megjithatë, në Kiev ekziston frika se një marrëveshje e tillë mund të jetë e rrezikshme për Ukrainën. Sipas shqetësimeve ukrainase, SHBA-të dhe Rusia mund të propozojnë ngrirjen e konfliktit në vijën aktuale të frontit, pa garanci sigurie për Ukrainën. Kjo do t’i jepte Moskës kohë të rikuperojë forcat dhe të përgatisë ofensiva të reja në të ardhmen, ndoshta edhe nga territori i Bjellorusisë drejt Kievit.
Në terren, situata për ushtrinë ruse është bërë shumë e vështirë. Gjatë vitit 2026, avancimi rus pothuajse është ndalur plotësisht për shkak të përdorimit masiv të dronëve nga të dyja palët. Sipas të dhënave të përmendura, Rusia po humbet rreth 140 ushtarë të vrarë ose të plagosur rëndë për çdo kilometër katror të pushtuar. Ndërkohë, strategjia ukrainase synon t’i shkaktojë Rusisë deri në 200 humbje jetësh për çdo kilometër territori të humbur.
Ekspertët vlerësojnë se nëse lufta vazhdon me ritmet aktuale, Rusia mund të përballet me qindra mijëra viktima të tjera për të arritur objektivat e saj në Donbas. Kremlini ka vështirësi të zëvendësojë humbjet me ushtarë të rinj dhe Putini heziton të shpallë një mobilizim të ri të detyrueshëm, nga frika e pakënaqësisë sociale dhe rënies së mbështetjes politike në Rusi.
