Ushtria amerikane ka kryer një sulm ndaj një anijeje të dyshuar për trafik droge në Karaibe, duke vrarë katër persona, njoftoi të dielën Komanda Jugore e SHBA-së (SOUTHCOM).
Sipas një deklarate të SOUTHCOM, Task Forca e Përbashkët e Hemisferës Perëndimore realizoi një “sulm vdekjeprurës kinetik” ndaj një anijeje me shpejtësi të lartë, e cila dyshohej se operonte përgjatë rrugëve të trafikut të drogës në Karaibe.
“Informacionet e konfirmuara zbuluan përfshirjen aktive të anijes në trafikun e drogës”, deklaroi komanda amerikane.
SOUTHCOM i cilësoi katër personat e vrarë gjatë operacionit si “narko-terroristë”.
Komanda amerikane publikoi gjithashtu pamje të operacionit, ku anija shihet duke lëvizur në det përpara se të goditet dhe të përfshihet nga një shpërthim.
Autoritetet amerikane nuk kanë dhënë detaje të tjera mbi identitetin e personave të vrarë apo destinacionin e anijes.
