Presidenti Joe Biden ka ndaluar importet e naftës dhe gazit rus në SHBA, duke shtuar sanksionet ekonomike ndaj Moskës, pas pushtimit të Ukrainës, në një përpjekje për ta dëmtuar atë ekonomikisht.
Edhe Britania e Madhe kreu të njëjtin veprim, por BE-ja nuk e ndoqi shembullin dhe në vend të kësaj zbuloi një plan për të reduktuar importet e gazit rus me dy të tretat brenda një viti.
Vendimi i SHBA hap një front të ri në përpjekjet për të izoluar Moskën nga ekonomia globale, pas lëvizjeve për të vendosur sanksione ndaj bankave kryesore ruse, zyrtarëve të lartë të qeverisë dhe oligarkëve, si dhe bankës qendrore të saj.
“Nafta ruse nuk do të jetë më e pranueshme në portet e SHBA-së dhe populli amerikan do t’i japë një goditje tjetër të fuqishme makinës luftarake të Vladimir Putinit”, tha Biden, duke folur nga Shtëpia e Bardhë.
Por një ndalim i importeve nga SHBA dhe MB do të jetë shumë më pak shkatërrues për tregjet globale sesa një embargo e plotë ndërkombëtare pasi vetëm një pjesë e vogël e dërgesave ruse shkon në këto dy tregje.
Kremlini u përgjigj përmes një dekreti që specifikonte se do të kufizonte eksportin e disa mallrave pas ndalimeve perëndimore të naftës, por nuk specifikoi detaje se për cfarë produktesh bëhej fjalë.
Nafta kërcen mbi 130 dollarë
Çmimet e naftës së papërpunuar u rritën sërish të mërkurën, ndërsa investitorët vlerësuan ndikimin e përkeqësimit të konfliktit në Ukrainë dhe një ndalim të ri të SHBA-së për naftën ruse.
Çmimi i një fuçie nafte, i cili kishte filluar rritjen që në janar si rrjedhojë e pritshmërive për një rimëkëmbje ekonomike globale dhe ofertës së kufizuar, është rritur ndjeshëm që kur Rusia nisi pushtimin e saj të Ukrainës më 24 shkurt.
Standardi global Brent u tregtua me 131,39 dollarë për fuçi, me një rritje ditore prej 2,66%, por ende poshtë pikut prej 139,13 dollarësh, që preku të hënën.
“Goditjet në tregun e naftës janë të vazhdueshme për nga vetë natyra e saj, dhe potenciali që tregu të arrijë në 150 dollarë përpara se të kthehet në 100 dollarë është më i lehtë për t’u tretur nga investitorët,” tha Stephen Innes, partner menaxhues në SPI Asset Management./ Reuters-Financial Times përkthyer nga monitor
Grafiku. Nafta, ne 5 vitet e fundit (USD/FUCI)
