Gjykata ka lënë në masën e sigurisë arrest me burg, sipëmarrësin e ndërtimit Bardhyl Fushën, autorin e grabitjes së fililalit Fibank në Tiranë, ngjarje e ndodhur tre ditë më parë (12 shkurt).
Avokati mbrojtës, ka kërkuar caktimin e një mase sigurimi më të butë se “arrest në burg”, duke qenë se, sipas tij nuk ekziston rrezik arratisjeje apo përsëritjeje, por kjo kërkesë nuk u mor parasysh.
Po ashtu, avokati ka kërkuar Kryerjen e një ekspertimi psikologjik/psikiatrik për të vlerësuar gjendjen mendore të tij në momentin e ngjarjes.
Fjala e mbrojtësit ligjor, avokatit Mirash Ndoci:
Në cilësinë e mbrojtësit ligjor të shtetasit Bardhyl Fusha, ndjej detyrimin të sqaroj opinionin publik lidhur me rrethanat e ngjarjes dhe qëndrimin e mbrojtjes.
Nga dinamika e fakteve të bëra publike rezulton se:
Z. Fusha është paraqitur në ambientet e bankës në mes të ditës;
Ka qenë i pamaskuar;
Ka lënë mjetin e tij personal të parkuar përpara bankës;
Pas daljes nga banka është dorëzuar menjëherë ndaj punonjësve të policisë;
Nuk ka ushtruar rezistencë dhe nuk ka tentuar arratisje;
Nuk ka pasur pasoja fizike apo humbje jete.
Këto elementë, për mendimin e mbrojtjes, nuk përputhen me tipologjinë e një grabitjeje të organizuar apo të mirëstrukturuar, por tregojnë mungesë planifikimi profesional, mungesë strategjie arratisjeje dhe mungesë përshkallëzimi dhune.
I dyshuari Bardhyl Fusha ka deklaruar se ka vepruar në kushtet e një presioni të rëndë financiar, për shkak të detyrimeve të papaguara ndaj punonjësve të tij në një shumë të konsiderueshme. Subjekti tregtar që ai ka administruar rezulton me vështirësi serioze ekonomike dhe detyrime tatimore, çka ka rënduar më tej situatën e tij personale dhe psikologjike.
Mbrojtja vlerëson se kemi të bëjmë me një akt të izoluar, të kryer në një moment tronditjeje të fortë emocionale, dhe jo me një prirje kriminale të qëndrueshme.
Për këtë arsye, në kuadër të procesit gjyqësor, mbrojtja ka kërkuar:
Caktimin e një mase sigurimi më të butë se “arrest në burg”, duke qenë se nuk ekziston rrezik arratisjeje apo përsëritjeje;
Kryerjen e një ekspertimi psikologjik/psikiatrik për të vlerësuar gjendjen mendore të tij në momentin e ngjarjes.
Ne respektojmë plotësisht organet e drejtësisë dhe presim që çështja të trajtohet me objektivitet, proporcionalitet dhe në përputhje me standardet e një procesi të rregullt ligjor.
Si ndodhi ngjarja?
Ka qenë mesdita e 12 shkurtit kur autori Bardhyl Fusha, 61 vjeç u fut në filialin e Fibank në zonën e ish parkut të autobusëve. Ai ka qenë i armatosur me një kallashnikov dhe sapo u fut qëlloi për të trembur punonjësit.
Më pas ai ka arritur që të marrë një shumë prej 8 milionë lekësh të vjetra, por sapo ka dalë është përballur me policinë, e cila e ka prangosur.
61-vjeçari nuk ka bërë rezistencë, por në dëshminë e tij ka deklaruar se e kreu grabitjen pasi ka pasur shumë borxhe.
70 mln leke borxhe
Bardhyl Fusha ka treguar se kishte rreth 70 milionë lekë të vjetra borxhe të pa shlyera tek punëtorët, për shkak se ishte sipërmarrës në fushën e ndërtimeve.
Ai ka deklaruar më tej se kishte zgjedhur të grabiste FiBank për shkak se kishte shkuar edhe herë të tjera aty kur kryente pagesat.
Fusha, me origjinë nga Gramshi jetonte në Tiranë me familjen në një banesë me qira. Ai u afrua pranë bankës me automjetin e tij dhe pasi e parkoi aty pranë hyri i armatosur në filialin e bankës.
Mësohet se roja i sigurisë private nuk ishte për momentin tek dera, por dedektori sinjalizoi se Fusha që sapo u fut në bankë kishte metal me vete.
58 vjeçari nxori menjëherë kallashnikovin nga çanta dhe qëlloi një herë në dysheme. Ai arriti të marrë vetëm 8 milionë lekë të vjetra në njërën prej arkave dhe sapo doli tek dera u arrestua.
Për armën e zjarrit ai deklaroi se e kishte që prej vitit 1997 dhe e mbante në banesë.
