Kriza në Lindjen e Mesme po përshkallëzohet. Shtetet e Bashkuara kanë dislokuar aeroplanmbajtësen USS Boxer së bashku me Njësinë Ekspeditare Detare prej 2.500 marinsash, në ditën e 21-të të luftës kundër Iranit.
Vendimi vjen pas një sulmi me raketë balistike iraniane që goditi Jeruzalemin e vjetër, pranë Murit Perëndimor dhe kompleksit të Xhamisë Al-Aksa.
Ndërkohë, udhëheqësi i ri suprem i Iranit, Mojtaba Khamenei, në mesazhin e tij për Vitin e Ri iranian, foli për një “ekonomi elastike” dhe për forcimin e marrëdhënieve me vendet fqinje. Ai paralajmëroi se populli iranian është më i bashkuar se kurrë përballë sulmeve.
Po ashtu, Irani lëshoi kërcënime të reja ndaj zyrtarëve amerikanë dhe izraelitë, duke thënë se “nuk do të jenë të sigurt askund”. Izraeli vazhdon bombardimet ajrore mbi objektiva iraniane, ndërsa raportet flasin për përplasje të reja në Liban mes forcave izraelite dhe Hezbollahut.
