Vetëm pak minuta më parë ambasada e SHBA-së dhe zyra e BE-së në Tiranë kanë bërë të ditur se nuk do të marrin pjesë në takimin 5 palësh të inicuar nga kryetari i Kuvendit, Ilir Meta, pasi, sipas tyre, kryetari i PD-së, Lulzim Basha, nuk pranon të negociojë mbi bazën e propozimit hibrid të ofruar nga zyrtarja e lartë amerikane Nuland me datën 10 korrik. SHBA- dhe BE vlerësojnë prerazi se negociatat mes palëve duhet të zhvillohen vetëm mbi bazën e këtij propozimi. Basha e refuzon këtë, gjë që e ka bërë të qartë edhe pak ditë më parë, duke kërkuar zgjidhje “ala shqiptarçe”. Thënë thjeshtë pazare mes palëve, të cilat përjashtojnë ndërkombëtarët nga procesi i vettingut. Basha kërkon që vetting-u të kryhet nga Presidenti Nishani dhe kryetari i Gjykatës Kushtetuese.
SHBA- BE deklarojnë se Basha foli për qeveri teknike dhe se ka përmendur fare propozimin hibrid. Në deklaratën e tyre të përbashkët për shtyp të SHBA-së dhe BE-së nënvizohet se:
“Ambasadorët Vlahutin dhe Lu informuan Kryetarin e Kuvendit z. Meta se pas deklaratës së z. Basha, ambasadorët nuk e kanë të mundur të marrin pjesë në negociatat e parashikuara për 18 korrik. Z. Basha foli për një qeveri teknike dhe nuk e përmendi propozimin hibrid që ai diskutoi me Ambasadoren Nuland më 10 korrik. Nëse z. Basha e rideklaron angazhimin e tij të mëparshëm për të negociuar ekskluzivisht mbi bazën e propozimit hibrid, vetëm atëherë ambasadorët do t’u bashkohen këtyre diskutimeve” thuhet në një njoftim të shpërndarë për mediat nga ambasada amerikane.
Palët kishin konfirmuar takimin pas takimeve me raportuesin për Shqipërinë në PE, Knut Fleckenstein dhe ambasadoren e BE, Romana Vlahutin.
Nga ky takim pritet të dalin konkluzionet zyrtare për ecurinë e mëtejshme të reformës në drejtësi. Paketa Kushtetuese e reformës në drejtësi është përfshirë në rendin e ditës të punimeve të Kuvendit ditën e enjte.
me. ar
