“Janë dhënë leje për të ndërtuar hidrocentrale në një zonë që është lugina e Valbonës, park kombëtar, normalisht në parqet kombëtare nuk duhet të kishte HEC-e”.
Kreu i Komisionit të Veprimtarive Prodhuese dhe Mjedisit, Eduard Shalsi thotë se shumica e lejeve koncensionare të dhëna pa kriter, përfshirë këtu zonat e mbrojtura siç është lugina e Valbonës, bazohen mbi leje mjedisore që nuk parashikojnë me vërtetësi impaktin mjedisor.
“Kanë qenë qoka për individë të ndryshëm”, thotë Shalsi.
Përfaqësues të banorëve lokalë të Valbonës nuk janë të vetmit të shqetësuar nga impakti që hidrocentralet mund të kenë mbi perla të natyrës si zona e tyre.
“Ka ardhur koha të ngremë cilësinë e dokumenteve për t’i paraprirë me studime mjedisore veprave të tilla”, shprehet kreu i Komisionit të Veprimtarive Prodhuese dhe Mjedisit.
Por, vetë Shalsi për rastin konkret ngurron të arrijë një përfundim: “Nuk ka HEC që po ndërtohet”.
Mungesa e informacionit dëmton edhe investitorët privatë, të cilët ndërkohë mund të investojnë miliona dollarë, në projekte që ata vetë mendojnë se janë në rregull me mjedisin.
Flamur Buçpapaj është administratori i të vetmit hidrocentral ekzistues mbi Valbonë.
“Është një grup prej 12 profesorësh nga më të mirët në Shqipëri që e kanë bërë këtë studim dhe këtë unë do ta zbatoj në terren. Hidrocentrali në 80 për qind të vet është ndërtuar në bazë të gjurmës ekzistuese, për të ruajtur ambientin është bërë një devijim shumë i vogël. Gjithashtu është bërë me leje nga organet kompetente. Më e bukura, thonë se unë do të ndërpres lumin. Vetëm 40 metër, një pjesë e vogël e ujit dhe kthehet përsëri në lumë”, thotë Buçpapaj.
Mungesa e një informacioni të plotë dhe të paanshëm mjedisor për kreun e komisionin parlamentar, Shalsi, kërkon ekspertizë ndërkombëtare mbi mënyrën se si duhet të kryhet vlerësimi në mjedis.
“A mos ndoshta ka ardhur koha të kërkojmë një ekspertizë ndërkombëtare apo ekspertë kombëtarë që bashkëpunojnë me studiues të huaj mbi një model, se si duhet të jetë vlerësimi i ndikimit në mjedis”, ngre pyetjen Shalsi.
